The Saga of Fergus mac Léti

Author: unknown

Editor: D. A. Binchy

An electronic edition


view the header | view the translation



p. 37.

1. (MS p. 363b) Batar tri primcinela in here .i. Feni & ultaig & gailni .i.
laigin. robatar didiu tri rigtigernai consniset flaith(i) feni .i. cond
cétcathach & conn cétcorach & eochu belbuidhi mac tuathail techtmair.
luid eochu for loinges co fergus mac leti ri ulath do chuinnchid neirt
& sochraidi iar foglaib moraib fri conn ria techt. bui iarum imale fri
fergus re ciana. doluid eochu bélbuide iar dain co cinel do imarchur
choru friu. marbsi(de) asal mac cuinn cetcataig & .iiii. maic buide meic
ainmirech .i. eochu oirisech & enna agenbras & ailill antuarad & tibraiti
traiglethan & mac ronuc dorn ingen buide do deorath.

2. is de rocett: ‘fogla(p. 364a)id forn mac (?) dia duirnn dia foghlaid
a cin do tuathaib targuth echtrann dun a forus fil co breith biru a bas
ninn mad rachtid adrorastar no aurnaidet a mathair a mifolta nis fol
forreth nach a finntiu foisither cach connli cin cinged hi cumalacht ceim
co nduiri fri saegalrith sir nochotacertmaim id laim lecther co .iii. mara
muircrecha ar is frit forruich.’

3. Et doget snaduth fergusa ime & a muintir. siacht fergus co sluagaib
a diguin. dobreth iarum a riar do & roictha fris .iii. .uii. cumal .i. cumal
do or & argat & tir .uii. cumal tir cuinn cétcoraigNitha ainm in tiri ara
lin do nithaib & debthaib robui imbi iar tain — & duine cam do fognam
.i. dornn ingen buidhi .i. siur do macaib buidhe ditngegnatar ach[t]
ba i ngill fri cimbid dobrethside no co ruigletis .uii. cumala cacha laime
robbi conad o sunn romes fiach digona rig cim[b]ith i cinaid .u.ir &
dobert conn tir i ccinaid a m[e]ic &rl.

4. Dogeni fergus ogcoru tarsa nericso & luid doa tir & bir[t] a
cumail lais i foghnum. IN tan ronainic fergus a methus luid docum
mara sechis & a ara muena a ainm. contuilsit and for bru in mara.
dolota(ta)r lucorpain dond rig conidmbert[at]ar asa carpat & bertatar a
claidem nuad i tosach. runucsat iarum co rainic a muir(e) conidforcualae
o rancatar a cosa a muir. dofiuchtradar la sodain & argab triar




p. 38.

dib fer cechtar a da la(i)m & araile for bruinnib. ‘anmain i nanmain’ .i.
anacal. ‘tartar mu tri drindro(i)sc’ .i. roga ol fergus. ‘rodbia’ ol int abac
‘acht ni bes ecmacht dun’. atgege fergus fair didiu eolas fobarta fo
muirib & lindaib & lochaib. ‘rotbia’ ar int abacc ‘acht aen ar[a]cuillimm
airiut loch rudrige fil ad crich ni dechais fai’. Dobertatar didiu in lucuirp
luibe dosom ina cluasa(ib) & imtiged leo (p. 364b) fo muirib.

5. asberat araile iss int abac dorat(a) a brat do & atcortad fergus ima
cenn & fo(r)bered muire & uisce samlaid. iss esside abac dide a cichesom
fergusa & gaba(i)s a gruaide i nnairide a anacuil. ISbert fergus ‘cid ara
ndenesiu sin’. ‘ni anse’ ar int abacc ‘fir fer linne in so’. is de ata inniu
gabail ciche fer & a ngruaide (Asberad araile dochuaid ogma lais gillae
fergusa dia roscar fria coin &rl
)
do chuinnche anacuil & do denum fir
dia inchaib &rl-a.

6. Laithe nann iarum admidair fergus fobairt locha rudraighe &
facba(i)d a ara & a carpat for bru in locho. A lluid fon loch con(f)aca[e]
in muirdris and peist uiscide uathmar. ala nuair rosraiged in uair naili
nosnimairced amal bolg ngobenn. La diuderc do fuire rosiapartha a
beoil doa dib culadaib & doluid as for tir ar omon & asbert fria araid
cia cuimacci’. ‘is olcc do gne’ ol int ara ‘acht nib lia. berthi cotlud dit’.
la sodain danalaig int ara ina carpat & contuil.

7. cein contuilsium teit int ara calleicc co gaotha ulath batar i
nemain mach[a] & inset doaib imthechta in rig & a mbui fair. friscomarca[i]r
doaib cia ri(g) nogebdais tara eisi ar nibud urusa ri co nainim
i nemain.
Ba si comairle gaoth nulad in ri do tuidecht dia tig & glanadh ara cinn
o cach doescurslua(i)g arna beth druth na hoinmid ann arna toirbeitis a
ainme ina inchaib & folcad faon do do gres arnach aiced a scath i
nuisciu. dognith iarom a imcomet co leir co cend .uii. mbliadan.

8. Laithe nann asbert fria cumail folcad do denam do. ba mall leis
didiu dogena[i] in ben in folcad. dobertsom buille di co nechlaisc.
gabsi tuirsi & dobi a an(a)im fria enechsom. dobert (p. 365a) builli ndi
co claidem co ndene di bloig di imeso. IAr suidiu co luith fa(n) loch
rudraidhi laa co naidche rofich in loch dib & in muirdris co tiged




p. 39.

a tonngar for tir. do(t)luidsium iarom co mbui forsan loch & cend na
piasta conidnacatar ulaid & isbert friu ‘meisi is tiugba’ olse. focairt fai
iarum marb & ba derg in loch dib co c(o)enn mis.

9. is desom rocet: Fergus mac leidi in ri(g) | luid i fertus rudraigi |
huath do[d]narfas fa gann (n)gle | ba he fochond a ainme.




© 2006 Thesaurus Linguae Hibernicae

Close this window