A Poem on the Day of Judgement

Author: unknown

Editor: J. G. O’Keeffe

An electronic edition


view the header | view the translation | view MS A9 on ISOS



p. 29.

(MS p. 38)

1. Brath, ni ba beg a brisim      in la loiscfis in domun,
ba coir, a Christ go n-gradhaib,      do sil Adhaim a oman.

2. Is dur in cined daena,      cruaidhi indat clocha a cridhi,
tan na taibret dia n-aire      na piana ai[d]bli ili.

3. Intan sgefes in talum      buidhni sil Adhaim adbail,
intan linfas aenlasair      itir nem ocus talmuin.

4. Intan conricfat aendail      dia ngleifidher cech caingen;
sluagh ifrinn, tuatha talman,      arbur naem, noi ngradh n-aingel.

5. Intan beras in brethem      bretha firena fira;
nem leis dona togaidib,      don lucht claen tormach ndighla.




p. 30.

6. Int aes umal imisel      craibhdhech co nglaine cridhi,
na dei[d]blena dereoili      beit a ngradhaib Righ nime.

7. Na brithemain beilderga,      na druit[h], na claein, na cainti,
na cruaidhcleirigh cosnamaigh      ni fuigbet fiadh na failti.

8. Na formtigh, na fingalaigh,      na cinn claena cin crabud,
na mna drutha dobanda,      fogebat bas is badhudh.

9. Bidh serbgoirt a n-aithrighi,      teilgfit dera tar gruaidhi
na heithigh, na heccraibdigh,      aesgach pecaidh cu mbuaine.

10. Bidh aithis, bidh imdergadh      do sluagh na claen atchiid,
tan atchichset na huili      pecadh cech duini diïb.

11. Iar mbeith fri re rofata      a teinidh bratha breoïd,
laifitir la ri[g] greine      a loc peine fa deoïd.

12. Bid truagh a ngair dogenat,      uch! bidh adbal a nguba
ac scarad fri naebhaingli,      ac techt fria demna duba.

(MS p. 39)

13. Mairg anmain na faichledar      breisim lai bratha brigaig,
mesa fo secht sechtmogat      aitreb ifeirn duir diglaig.

14. A rofhuacht, a roloscud,      a gorta, a ita adbul,
a tuargain, a tromdigal,      a grain, a muich, a marbadh!

15. A ilpiasta aigthidhi,      a cned, a golmairg merda,
a muir tuilbren teinntidhi,      a gnuisi daera demna!

16. Mairg tainic ’sin mbethaid-se,      mairg diar corp, mairg diar n-anmain,
do neoch diana[d] irdalta      siraitreb ifirn angbaid!

17. Ar do baidhi, a baidhathair,      ar do cennsa, a Rí nime,
nimreilce isin searbcarcair      itáit osnadha ili.

18. Ar gach n-impidhi n-uasail      i nim ocus a talmain,
intan tairgeba lem-sa      dena cennsa frim anmain.




p. 31.

19. Ar do croich, ar do cesadh,      ar do righ[f]laith, a Ruire,
tair dom chobair co calma,      i crechtaib m’anma uile.

20. Ar cach n-impidhi n-uasail      i nim ocus a talmain,
notguidim, a Christ chridi,      rop flaith nime dom anmain.

21. Ar do croich, ar do cesadh,      namcoimed ar gach cloeine,
na ramloiti, a Ri nemda,      aslach demna na daine.

22. Ar do croich, ar do cesad,      tair dom chobair fo chetoir,
resiu tias don bith buidhi,      beir uaim uili cech n-eccoir.

23. Ar do trocaire n-adbu[i]l,      namcoimed in cech inbuidh,
tuc do rogradh im anmain,      co rob lomlan dot inmuin.

24. Corbam cruithnecht it it[h]lainn      i lo loiscthi na catha,
co rucur buaidh is coscur      tall i mbroscur in bratha. b. n.



© 2006 Thesaurus Linguae Hibernicae

Close this window