Cormac’s Rule

Author: Cormac mac Cuillenáin (?)

p. 63.

1. Sámud buan bríathar-ísel, fó húar mad mé foglésed.
sastum a necna nuasal, a ceól cluasach na cressen.

2. Canam a ceól rocansat na sruithi, seol rosonsat.
fomenainn as mo cholainn rodlomainn a nrodlomsat.

3. Dán buidech briathar dimbrass, oc toil ind ruirech rognas.
ní bu báes, ni bu amless, umlae dond áes bad chomdas.

p. 64.

4. Celebrad cóir co nainmnit, is mind cach muid moir molmait.
tuä intan bas nadlaic, abrait fri nem(?) fo chomnait.

5. Céim co sruithi sech ríga, freitech fina ocus feola.
glantogu deingráid buada, anmchara umal eóla.

6. Ord coibsen, cuma gnáthach, ceim fathach, foguir úathad,
ríagal glan-amra glethech, nebbuith fri éthech nuathach.

7. Ni heress nolc, ní báegul: serc Dé dliges a úamun:
ceim cen chlóenúaill o Diabul, nebbuith óenúair i núabur.

p. 65.

8. Ainmne, nechte co nóibi, léciud sechte co sóibi.
nóebphroinn cen sháith cen shéri, fít bec blaith, buith i nóini.

9. In troscud tráth bas nadas, in costud febda fedes.
túaslucud tan bas niress, dligid náchthairle eress.

10. Ere crábaid co censai, álaig idon cen toirrsi:
menmae fri sirnem sorcha, dorcha do reicc ar shoillsi.

11. Sethnach tanaide todeóir, légend la sobeóil senoir:
cor ar comrad fri Canoin, dermat in domnain deroil.

p. 66.

12. Din anma, ascnam nime, brig amra, altrom glaine,
bíad bís iar ndíbdud toile, corp Crist la fuil Maic Maire.

13. Étiud ban besaib srotha, sassad slán sorcha sretha,
is lór lim om ríg rethach i forbu bethad betha.

14. Bad gnim gáise cen báegal: ternam a baes a bádud.
ni dimbraigh sen uamad is inmainse samadh Samud.