Gebet um Schutz in Gefahr

Author: unknown

p. 6.

1. Dia lim fri gech snīm,
trier ūasal aon,
atha[i]r ocus mac
ocus spirat naob.

2. Naobrī grēne glan
is cāimhe gach dlug
atach n-amra ndamh
fri slūag ndemna ndub.

3. In t-athair, in mac,
in naobspirat án,
in trēde dom dīon
ar nēlluib na plāgh.

4. Ar dianbās, ar bedg,
ar brataib na mberg,
romain Īsu ard
ar in ngalur nderg.

5. Ar demnuib nach tan
is mac Dē domein,
ar galur, ar guin,
ar toruinn, ar tein.

6. Ar tinnorguin truim,
ar cech n-amnus n-aill
ronsēna co grinn
mac Muire mo broind.

7. Ar ban-brethuib brath
Críst lem fri cech sōet[h],
ar idnaibh, ar ūath,
ar neimib na ngæth.

8. Ar gābud, ar brath,
ar epdaib hi clith,
ar teidmaim cech cruth
rofera don bith.

9. Cech bendacht, cech goim,
gach erndaigthi glan,
cech aradh ric nemh
robo cobrad dam.

10. Cech dagnaom rocés
ōs tuinn talman tís,
cech deiscibul cāid
rocreide do Chríst.

11. Cech cenduis, cech ciúin,
ceach diūid is gach rēil,
cech faoismech, cech mīl
docuisin fo grēin.

12. Cech naomērlam sruith
domroirecht fri toich,
gach sempal, gach saor,
gach naom rocēs croich.

13. Cech oilithir án,
cech suim sochla brīg,
gach daonnacht, gach naom
rodēracht a tīr.

14. Cech tenga gan mēt
forsa tarda rath,
gach cride fon mbith
nach coda nach mbrath.

p. 7.

15. Cech mac fīrēn fial
fo clār nime glain
ōnd fuined aniar
co sliab Siōin sair.

16. Romsnādat desiu
ar demnaib na céo
cēli maic in Rīg
a tīrib na mbēo.

17. Robé Dia dom dīon,
Comde aingel án,
aithned tain (?) ūad
ararīsed slān.

18. Romsnāidhe mo Rí,
romain in gach rē,
robēo ar gach ngād
ar scāth dernonnd Dē.

Dia .l.