Mochutta .cc.
Author: unknown
Editor: Kuno Meyer
An electronic edition
p. 43.
(MS f. 263b)
1. Ind ecclas næmh nemda, is sær hí is crodh cundla:
tabraidh taobh re sruithnert, is cruithnecht, is craobh cumra.
2. Da ngabaid ind-ecclais, curbá haltrom næidhen,
gurab tren bhar mbriathar occ biathad a háidhedh.
3. Is siad so na háidhigh is dir isin ecclais:
lucht lubra & léiginn, boc[h]tain deiblein diadha:
mogenar dogenad cobair ac a fegadh, oc denamh a riara.
4. Da ngabhaitt i n-ecclas, fograim daibh a pudar:
abraidh náchas gebaid no denaid a lubair.
5. Da lubhair a tempuil: ceilebradh is crabhadh; a haltoir maith maisech,
co raibh si arna senad, gurab cæmh re fegadh iar ndenum a caiseal.
6. Da ngabaid a n-ecclas, foccruim, ni rádh rúine,
daigh is lim as cumhan, gurab eirghe curadh, bidh ulad cech cúile.
7. A haith[l]e na n-ulad fóccraim, is rádh bunaidh,
da ndernaidh bar sæthar, da moraidh bar lubhair,
saothraighet bar ccosa, imdaighter bar lossa,
toccbaid súas bar mbosa, bid crosa ós gach ulaigh.
8. A hait[h]le cros cinnte da cinnid bar sæthar, ní abraim ribh anad,
bar ndul amach re bliadain, gurbat faicet fiadaigh oc iarraidh bhur manach.
p. 44.
9. Gach manach dobera a edhbairt don ecclais,
do dhenamh a sæthair, do mhoradh a c[h]ille,
rob leis féin a díni oc treabhadh a tíre,
cu rachtea ar críne a righe ar muigh nimhe.
10. Gach manach nac[h] tiubhrae a edbairt don ecclais,
do denam a sáetha[i]r, do móradh a lubhar,
a gort ní rab genas, rob olc gach ní treabhas,
gurab demon bheires, gurab de lenas pudhar.
11. Ná rap pudar daibh-si, troiscidh ar na manc[h]aibh,
diultfaid for ind ecclais, iss edh dlegur duibh-si,
mad becc libh a mberaitt, eirghidh & treabhaidh,
dénaid gurta gemhair, lenaid as in ecclass.
Ind ecclas næmh nemdha & rl.
© 2008 Thesaurus Linguae Hibernicae