Ciaran Saigre cecinit

Author: unknown

p. 13.

(MS fol. 12b)

1. Deich ndoirsi ar buaile mo buair, deich croi cech dorais drechruaidh,
deich loig cecha croi cen chrad, deich mbai mbaetha im cech mbaethan.

2. Dom chabais do mac Muire, cid ingnad libh-se uile,
ní dechaid fom dhed anunn coibeis friget dia n-andlunn.

3. Coica sesrach am chill chain i Saighir trebus talmain,
dom chabuis, a Christ caingnig, ni dhuadhus dib aenbairgin.

4. Sruban & usce glan, ba hi mo proinn in cech tan,
[ba he] annlann romgnathaig, da mhecon do murrathaig.

5. Da croicinn laigh cinn a cinn cubat mo thaibh, cloch fom c[h]inn,
cuilche fliuch taram choidche cech n-enla is cech n-enoidche.

6. Ann mo Shaigir-si cech tan, cipe rosia bidh idhan,
bidh comainn cech ain ar leith co cenn coic trath is a deich. Deich.