Danklied eines Schwerkranken

Author: unknown

p. 263.

(MS p. 40)

1. Atlochar duit, a mo Rí, do-gni ar sochar ar bith ce,
o domrala il-ligi leoin se mis fo deoid cusane.

2. Ato mar chimid i cip do tarrachtain imid n-uilc,
suas beres m’anmain inocht, mo chorp isin talmain tuit.

3. Domratad i slabra[i]d sunn, maith dom anmain as gach am,
bec mo nert, am scith bun’s cind, indar lim fomrith co fann.

4. Fearr lem, a degmic De dein, cidh leir in treblaid rom-t[h]raig,
ina fledhol im t[h]ir tuaidh no degor cin luaigh fom laim.

5. A log mo chuil is mo cealg mad romgab muin mo cech mairg,
domfaraill, ni duairc in t-[o]rt, beim nad borb dot abainn aird.

6. Atu-sa mar bis dall dub, is mo t[h]aeb co fann re fraigh,
monuaragan, a De dil, mise truaghagan in taigh.

7. Testa mo neart, nual cen cleith, a Athair na sluagh, nam-saich,
romlais i cuimrech i croich amuich i tir Muimneach maith.

8. Matat co met teimil truim mo da rosc i ngeimil grinn,
adsæilim, a Ri na rann, beither tall co hæibind ind.

9. Is e mo samail acht bec mar bis luch gabail ar gruig,
ic a crothad fo c[h]rub c[h]ait, ní nach ait, atlochur duit.

10. Uch! nocha n-eirgim cen cneid, nocha teigim fo guth cluic,
ni gairit m’othur ar m’olc, a Dhe, anocht atlochur duit.

11. Mun badh tac[h]rad, a De, duit, atberainn astan cen at,
imomcenise arad rod, mor lem a fod at intat. A. l.