Ermahnung den Leib zu kasteien

Author: unknown

p. 264.

(MS p. 38)

1. A c[h]uirp, notc[h]aith fri crabud! dena maith, na bi i mbaegul!
derb biaidh co luath cin labra i lepaidh talman t’ænur.

2. Is e do t[h]echta tongu, cath frit c[h]rechta ’s frit c[h]aire,
guidh in Rí[g] reill nach faicther co ti d’aitreb do t[h]ighi.

3. Trebaire is tir i-tathar ni gnim ceanaidi at-cither,
crabud ar bith ni bæthar, maith in saethar dia sníthar.

4. Crabud croidhi glain genmnaidh in denmna samad sobraidh,
cainiudh cach cinadh caingnig co nderaib saidbrib solmaibh.

5. Srian frit broind, buaidh ria mbannaibh, srian frit c[h]ridhi cruaidh cumail,
srian do tabairt fri tengaidh cen meandair is ciall cunnail.

6. Is set cert caem co cuibdhi techt co Dia naem norn-anghi,
rochtain cosin Rí[g] nemdha acatat sealba sai[d]bri.

7. Saltrad ar demon ndimbraig na rab marcach ar t’anmuin,
he do rath in c[h]uirp chredlaig, cath fri cach n-erbaidh amlaidh.

8. Ernaighthi, aine it aiseul re claine ar cach conair,
co ris in saidhbri suilid iar ndai[d]bri duilig domoin.

9. Druim fri mna mætha mine, daigh nidat gætha a ngaire,
laim fri lochta co leire, feili is bochta co mbaine.

10. Betha craibdech co cuibdhi, aicned ailgen cen ainble,
is dreim diadha cin dimda ceim cialla idhna ainmne.

11. Atciam erchra na ndaine, cia mairit tealcha ar tire,
is bec nach fas cach feili bas co ndeine gach dine.

12. Is denta dun ord iarum, betha nach borb ’s nach baeghal,
lucht an talman ac traghudh, slabrudh diar snadhudh saeghul.

13. Sgarum fris gach mbæs mbunaidh, na carum craes na cinaidh,
saltram for tarbaib tomair, cobair diar n-anmuin idhain.

p. 265.

14. Ifern denn, doer an dithrub, romeall mor loech co luathc[h]ur.
carcair cruaidh corr crom casrach, loc lonn lom lasrach luachdub.

15. Mairg lingis leim in leth-sain, mairg cingis in reim rod-sain,
mairg bias isin mbriaidh mbrisc-sin, romiscnidh liaig in loc-sain.

16. Leic uait do lot[h]rad luarda! leic do c[h]odlad is do c[h]æmda
ingaib ifern searb sianach, rothi nem niamach næbda!

17. Not-imber frisin maith-sin ar fis imaid an uilc-seo,
ar an Athair n-ard n-amra cathaig co calma, a c[h]uirp-seo!

18. Fotracaib, a c[h]uirp congbaid, gnim co n-altaib uilc adbuil,
t’athair o tacmud meabraig erbaidh adbal fon talmain.

19. Do mathair maith co mine, do da brathair co mbaine
tucsat fo tuinn uill uire co nduire a ndruim fri daeine.

20. Docuaidh i n-uaig giarb esbaid nech iar mbethaid gluair glasglain,
erchra in fhir cubaidh cosmuil dobeir osnaidh fom asnaibh.

21. Ermor ar caem ’s ar carat robadar co sær sealat,
fuaratar tir na togat, fir co lobat, co leaghat.

22. Ni luga legfa feisin, nocot-fia seachna sosaidh,
iar do brudh, iar do brisiud biaidh cin clisiudh fo chosaibh.

23. Comaill a n-ecna n-uclan, bi co becda amail bochtan,
bidh snadhudh for set sercnæm crabud certc[h]aem i corpan.

24. Fogebat plagha pecthaig, ar it lana do lochtaib,
a n-anman duba i ndaire, ferr leo cæime dia corpaibh.

25. Cidh tend do berla bladhach, cid at seg[d]a seang subach,
not-isat dæla duba, linfat cruma do c[h]urach.

26. Cach soim is cech doim seachtair, cach æn fo mbi coim colcaidh,
is talum moirtc[h]enn martair carcair coitchenn dia corpaibh.

p. 266.

27.Iar teacht don domun dronnfinn, iar cach robud cert cluinim,
cen trist om c[h]urp geal glanfinn m’anim i n-ucht Crist cuirim. A. C.