A New Version of the Battle of Mag Rath
Author: unknown
Editor: Carl Marstrander
An electronic edition
view the header | view the translation | view the Yellow Book of Lecan on ISOS
p. 232.
CATH MUIGI RATH ANDSO
DOGNITHEIR FEIS TEAMRACH la Domnall mac Æda mic
Ainmireach & ite teora feisa hErenn .i. feis Eamna feis Temra
fes Chruachna. Conacart firu Erenn docum na fesi Temrach
sin. Dorondad imda Domnaill for lar in rigthaigi a Temair &
[5] rosuigided in sluag iarsin (MS col. 946).i. fir Muman isin ceathromain
deisceartaig don tig. Condachta a niarthar in tigi. Ulaid ina
thuaiscert. Laigin ina airther. Medon Erenn im Domnall isin
tig sin. Fon indus sin dorondad in les rig Laigen isinn
imdai ar belaib anair ri Muman ara laim des ri Conacht fora
[10] chul do ri Ulad fora laim chli. As amlaid so immorro nocoraigdis
dia mbad o Uib Neill i ndescert in rige .i. ri Laigen fora laim, ri
Ailig fora laim chli & ri Ulad fora laimside, ri Muman fora laim des
& ri Conacht fora chulu dia nebrad annso.
YBL
Teamair sær in sosad.
[15] do cach ri dia rime:
ime maith in taigi.
suidhis flaith cach thiri.
Dia laim des dodesig.
ri Caisil cain curi:
[20] ri Laigen lith ngraide.
a cedlud fri suidi.
Suidi airdrig Ailig.
dia cliu chain co clothnai:
ri Ulad ard athnai.
[25] i cedlud fri fochlai.
p. 234.
Deisig flaithri Conacht.
iar cul cain co cleatha:
fri senchas sær srotha.
fri buaid ocus beatha.
[30] Bagasu in scel sa.
is fir cianusdearba:
suigedud ard amra.
tigi tuathaig Temra. T.
Harleian 5280
Temair sær in sossadh.
[15] do cech rí dia rimhe:
imme maith an taighi.
suides flaith cech tiri.
Diam laim deis. . .
ri Caisil cain cuiri:
[20] ri Laigen lin ngraidhe.
hi cetlud fri suidhe.
Suidigh airdri Ailig.
dia cliu ceim co clothgai:
ri Ulad ard nathe.
[25] hi cetlud rig Fochla.
Fosernd clothri Connacht
ier cul cáine sretha:
fri senchus soer fatha.
fri buaid ocus breatha.
[30] Baghaso an crutsa.
is coir cia noderba:
suid[igud] ard amrae
tige túathaic[h] Temra. [Temair.]
[35] Rocoraidhid iarum ic Domnall cách fo gradaib & i ndanaib
& a ndligemnus im chosdud na fledhi: ri Ulad didiu fora laim chlí
.i. Congal cæch dalta side dosom .i. do Domnall ise ronalt.
Is aire adberar Congal cæch deseom .i. la doluid a lubgort in rig
docurethar beach and chuici corobris a shuil ina chind conad deside
[40] robai Congal cæch fair. Robadar Ulaid i[c] cuindgid shula a mic.
Roucad breth co Domnall. ‘Adbiursa’ or Domnall‘in sluag
ucud on dernad in erchoid a marbad noco tæth in cintach.’ Nir
bo lor la hUltu immorro innisin & bai fich immorro la Congal
on uair sin.
[45] Forodlad didiu don t[sh]luagh. Tuctha da oig dhec chearc
for meis co mbai a cuil don imdaig. Aired robai Domnall
oca ndail ina shesam aduaid iarum Congal og dona huigib. Desid
Domnall tuctha na huigi sis. ‘Adubairt in ben dusfuc na huighi’
or Domnall ‘badar da og dhec and. Mallacht fuirri a rad ngua
[50] im aighidhsea.’ ‘Mesi adoigh og dib’ or Congal. ‘Dentar duit
didiu’ or Domnall ‘ar ni ísa fuighell na goide’ ‘Gadaigi dogni
dimsa ’ or Congal, ‘adlochamar do dia a Dhomnaill nach iar nithi
do bidh atam ocat agallaim.’ ‘Dober og noir duid’ ar Domnall
‘& na himraid frim in ogh.’ ‘Ergid a Ultu’ ar Congal ‘nad
[55] estai biad Domnaill. Facbaimsea athesc lat a Domnaill’ ar
Congal ‘cath uaimsea duid dia mis ondiu. Co tarda nechtar
fath ar bas i mbeola a cheli imon ogh uan.’ Nosléiced imach
Ulaid im Congal. Rola cor mor do feraib Erenn anisin. ‘Cuma
p. 236.
lib’ or Domnall ‘glefid dia edruind i nensist. Rocluinid immorro
[60] a nerfuagra ara mbeithi a nearlaime cosa la sin.’
Luid iarum Congal fochetoir a crich nAlban .i. co Domnall mac
Echach Buidhi co tucad leis firu Alban co tancadar cæicthigis
riasin cath. Rolaite for coindmed cach naidchi re fed sechtmaine.
Ba trom didiu la hUlltu in coindmed sin cach naidchi. Adnaig
[65] remib co Mag nGlass co mathir nDomnaill conar fhargaib boin
na dam na mnai na mac ind. IS andsin asbertsom.
‘Saim lim forfhacbus Mag nGlas.
nir fhacus and (MS col. 947) im na ass:
nir fhacus and boin na mac
[70] ac Domnall ni caintairrngert.’
‘Bid granna som ina fharrad’ or Domnall. Lodar immorro
fir Erenn im Domnall. Dothæd didiu Congal don leith aili. A
naimsir fogmair didiu sin. Conacasom in clerech oc buain a shaineri
inti Congal. Is and adbert ‘Can mair in clercin ni mor do eithiuch
[75] tongus osin inflaith Domnall tongmai da neiteach Domnall congobus
comlond .i. Domnall mac Echach & Domnall mac Æda.’ Tuctha
scrina & minda & naim Erenn eturru & nir fedad a corugud .i. in
satan robai a comaid Congail is ris doberead a comairli. ‘Na
telg’ ol in satan ‘in mbreithir adrubairt fiad feraib Erenn. Nicon
[80] biad do maine dia treicea. Dia meba immorro remad bat ri Erenn.’
Roclandad didiu pupall Domnaill & dodeachaid fer dia muintir
dimbirt fithcilli fris & rosuigided abucc for cleith do dercaideacht
osin tsluag. Maithi a roisc na nabocc maithi a cialla. Dunchad
immorro hua Mæil Macha in cured & in caithmiled togaide & in
[85] cliathbernaid cet andsom do læchaib in domain fer grada do
Domnall. IShe roherbad a nagaid Congail & a da comalta Dunchada.
Rolaised na sluaig gair mor ic dula isin chath. Fada
immorro ind imbert doradad and na tri láa imslana. Cach
cuiced a lá fosnuapaird cosa la ndeidenach. Mor do chæmaib
[90] dorochair and. Mor in tar & in tairleach laigi robai and triasna
p. 238.
tri laá imlana. Robai uall & imnaire and. Ba himda ræn fola dar
gelchnes mæthoclaig and oc techt i ngabad ar imnaire. Ba
hamnas soigti na curad & na lath ngaili oc imditin a ngai & a sciath
& a corp antan nobidis a chele oca truastad dona gaib & dona
[95] claidbib. Amnus didiu in tornech robai seachnón in catha .i. gair &
bresim na sciath laindreach & fedgaire na claideb & na calg. Cairchi &
grinnigur na saigedbolc & na srian & edghud na saiged & briscbemneach
na narm. IS beg tra nar comrancadar ind a mer & a
cos aca nimthuarghain co tuislidis asa sesam la slimrad na fola fo
[100] chosaib co mbentais a cind dib ina suidib. Tuargabad cath croda
crechtnach braineach fuileach & rorósa uinsend i crobaib bidbad and.
Cidh fiach immorro nobeth for suil Congaile ni focichread de .i. la
Dunchad ara glicce & aithi & amaindse in laich Dunchada. Fecht
and didiu rogeodhain Dunchad in gabar robai fai. ‘Robith gabar
[105] Congaili’ or cach. ‘Berar mo gabairse do’ or Domnall. ‘Romebaid
sciath Congail’ or cach. ‘Berur mo sciathsa do’ ar Domnall.
‘Romebaid claideb Congail’ ar cach. ‘Berar mo claidebsa
doo’ ar Domnall. Intan nosaighed Congal nosraintea in cath
chuici. ‘Cia dober in nertsa?’ or Congal. ‘Sluag Laigen’
[110] or cach. ‘Nisnaghamur’ or se ‘gal chon for otrach sin.’ ‘Cia
so didiu?’ or se. ‘Fir Muman’ or cach. ‘Nisnagamur’ or
se ‘corósin gala oenfhir .i. fal findcuill ann sin.’ ‘Cia dober in
nertsa?’ or se. ‘Conachta’ or cach. ‘Nisnagamur’ or se
‘uth bo bruithi sin sluag imlebar imscith.’ ‘Cia dober so?’
[115] or se. ‘Osraidi’ or cach. ‘Tairr muci iter da tæb sin nisnagamar
in sluag.’ ‘Cia dober [in nertsa]’ (MS col. 948) or cach. ‘hUa
Neill i ndescert’ or cach. ‘Nisnagamar’ or se ‘torcrad Mide dia
nechaib teni tria fidnaid .i. tairnid indara ceand cia torcba aroile.’
‘Cia dober in breisim tornighi moiri seo?’ or Congal. ‘Cenn
[120] nEogain Moir & Conaill’ or cach. ‘Ni ba hinmain on’ ar se ‘in
p. 240.
mothar sciath sin a mbernai nad raigther techt trit no thairis.
Atnagamar in sluag sin.’ ‘Cindus innosa ata Domnall?’ or
se. ‘Ita i croisigill fria dia anosa’ or iad. As ann asbert
Congal.
[125] ‘INtan fortgella in ri.
in ri aile nat aicci:
ise nad forraich fri neach.
mac Æda mic Ainmirech.’
‘Ragadsa cotartar a reir do.’ Dochuiridar do iarum timchiull
[130] in catha co toracht in pupall. ‘An a Chongail’
ar na hoic. ‘Do thobairt’ ar se ‘a rere do Domnall teigim co
naca fir Erenn iarum a reir uaimsea amail adcondcadar comthurcbail
fris.’ ‘An bicc a Chongail’ or Domnall ‘rolaesemar da ghiall a
tech rig na firindi imar nimresain noco ruca breith duinn co ndingnim
[135] aithbreith de.’ ‘NI ba head bias and’ ar Congail. ‘Edon
didiu’ ar Domnall. Imonarnaicc iarum do Chongal & do Chonall
Clocach in rigoinmid isin chath. ‘Gaib rand a Chonaill’ ar
Congal ‘dus cia riasa maidfea in cath.’ Dixit Conall.
‘Macan docing sligi rath.
[140] imma tuarad lechta roth:
sescbaid cade sund in cæch.
forsa torchair Congal cloth.’
‘Sæb gebi in rand’ or Congal ‘Ni samlaid ita acht amne.
Macan doching sligi roth.
[145] ima mbiad lechta loech:
sescbaid caidi sund in cloch.
forsa torchair Congal cæch.’
‘Bid fir’ or se ‘dofuithebsa and.’ IS andsin tra imidrubart
forsin sluag amail rotharb ndasachtach dia tabar drochbem.
[150] Is amlaid sin in rothach & in ruathar ronuc fon sluag conad
imale roimred forro na go & na claidbe & na sciathu & na bocoidi
p. 242.
& na bairni na cloch. Ni roan don ruathar sin tucustair co mbai
cind ar cind fri Dunchad frisin láith ngaile ucut & co necmaing
a ceand dia suidiu dara sciath anechtair. ‘IS grani lim innosa’
[155] or in dearcaid ‘in ceol sana rocluinim sechnon in chatha .i. fedgaire
na claideb illamaib na læch & na lath ngaili na ceann & na cnam.’
‘INanmaim de seo’ or Domnall. Fonuabair fesin sis isin cath.
In gres didiu doradsad fir Erenn ac deicsin gnuisi Domnaill isi
nobris forsin sluag co raemid in cath for Ultu & co ndorchair and
[160] fesin in ri .i. Congal Cendfhoda. Rolaud a nar iarsuidiu conna
erla fer de feraib Alban [acht] trenfher Domnaill. For snam
dochoidside thairis. ‘Scela lat’ or Domnall mac Echach. ‘Deog
dam’ or se. Doberar sesra do chormaim do co nesib na oendig.
‘Deog aili dam’ or se. Tucad seasra aile do co nisib. Atib
[165] tri seasra amlaid sin. ‘Scela lat’ or Domnall. ‘Cia scela conigi’
or se. ‘Nochon fhaicfide fear dia ndeachaid uaib co brath acht
misi am ænur.’ Adbail fochetoir.
Tucad iarum in cennail ar belaib Domnaill mic Æda. Tucad
cuici ceand Dunchada & a da chomalta. Is ann adbert.
[170] ‘Na da Fland fil isin du.
robdar cele rig anu:
farir roclæchlosed dath.
suaichnig nithic Dunchad.’
Dorochair and didiu ri Mide .i. mac mathar do Domnall asberad
[175] som. Is loc rodusmarb amail asbert Domnall.
‘Cia gontor Faelchu aniu.
ni fuigeb la a . . . . iu:
gebthair illoc lilith de.
co de bratha brogaide.’
[180] & as[bert . . .]
‘IN maccan gignes indiub.
bid cath roth a airisiu:
. . . . . . s ruiri bid rom.
anad do chainet[h] Fhælchon.’
p. 244.
[185] Ba [. . . . as]lu isin chath & a gabair maille isan ath & . . .
marb dib linaib conaid ann roraid Domnall.
‘Ni celit baill Congaile.
is derg ucht asanindaim:
intech inargiallad.
[190] nidad fæbra aringaib.
Ni bo curi cin faire.
oic i fail Congaile:
ni bo tuath cen rig a cath.
mac Scandlan a cind arrad.
[195] Bid a ainim; fri foichle fen.
fri saigid i netercen:
mairg ara ta glonn fri gail.
ettach no accen Congail.’
Doradad iarum Congal isin nathles & dorigned a tonach occa
[200] & tucad a cheand fora duma na ratha conad and asbert Domnall.
‘Ceand Congail so forsin raith.
ni cend fhir omnaid co nuath:
ceand risnach geibthea am goil ngaith.
cend laich nach lamtha coluath.
[205] Ba calma cach isa cend.
in trath fa tend nir bo thim:
cia dorochair Congal cæch.
mor læch adrochair da rind.
Amriced sair ocus siar.
[210] isin chath chian ruslai sluag:
nir thim a fher fri fecht fir.
ria rodergad rind ruad.
Ranic ria cach don chath chain.
dia mairt iarsin rosaith sleg:
[215] co torchair ina gliaid guil.
fæn ina fuil fich in fer.
p. 246.
Ronfuabair sin cetain chruaid.
tuc ecain don gnim co ngrain:
condrochair le Congal cæch.
[220] ceithri fichid læch dia laim.
Ronfuabair dia dardain duind.
co ruc in ræn riana rind:
coromarb coicait don tsluag.
in la sin nir fer truag tim.
[225] Dia haine rosiacht.
ba gnim ngaine ba cro crecht:
cuic fichid fer sribglan suairc.
dorob ingnad in cuairt crecht.
Dia sathairn tanic don cath.
[230] Congal ria grafuing na crech:
coromarb cet cæmach ruth.
ba leor duchan eg re nech.
Dia domnaig tanic martur.
turus Congail robo chruaid:
[235] coromarb coicait ar da chet.
do Ulaid dia mbaised ar sluaigh.
De luain rolamair a gleo.
nir bo thruagh ingen robai a mbiu:
romarb ceithri macu rig.
[240] ceithri fichid aræn riu.
Fuairsum olc dia mairt in mind.
ait a tarad tend ri tenn:
ba gnim ngalar fa cro gand.
ba hand rocabrad morchell.
[245] Ro espa a dul dosand
rotesta cind imon cenn. C.’ FINIT.
© 2006 Thesaurus Linguae Hibernicae