Poem on the Observance of Sunday

Author: unknown

p. 143.

(MS p. 39)

1. Denaid cain domnaigh De dil, fegaid, fomnaid, frithailid!
Crist codnach rocind co cert an domnach can toirimt[h]echt.

2. Toirimt[h]echt domnaigh De dein a fogus no i n-etircein,
amuigh no a tigh, monur mer, is tar sarugud in Choimded.

3. In Coimdiu cend cach dula rochidh renn na righruna,
rí nime, ri in talman tind ocus ri adbul ifirn.

4. Is e rodealb in doman gan egla gan imoman,
dorat se laithi co cert don domnach da thimthirecht.

5. Ba hiat sin na se laithi co sligedaib degmaithe,
co n-innisiur iat ’sin rann co tairsem a senanmann.

6. Luan, mairt, cedain is dardain aine [ocus] satharn d’entaib,
. . . . . .

7. Ca tathar duin do domnach des sech gach laithi landiles?
ca tathar d’a se co se do fognam in enlaithe?

8. Is aire seo atathar dó, do domnach gan imargo;
ann doroine Dia immalle rigt[h]egh co n-ainglib nime.

p. 144.

9. ’San domnach doroine an mais is gainium in talman tromglais,
i raibi teine tend tren ’sa raibi uisci is aeidher.

10. ’San domnach doroine in ri Adham alainn mac De bi
is uaidh dogeinset uile daeine in talman tonnbuidhe.

11. ’San domnach, is fath fire, dotraig ar tus in dile,
’san domnach rucad an mal int athar uasal Abram.

12. ’San domnach tucad an recht do Maisi co morchert,
’san domnach, ba mor a lith, tucad righi do Dauidh.

13. ’San domnach tucad roga do Solum saidbir shona
ar dainib diada in domuin da ruc egna d’ardrogain.

14. ’San domnach dodechaid ass a broinn in bledhmil Ionas,
’san domnach, ba mor in gloir, do saerad in Baibiloin.

15. ’San domnach rucad Muire, innised cach diaraile,
’san domnach ruc Muire in mac Crist co nellaib ar nidnacht.

16. ’San domnach baithis Crist caidh i sruth alainn Ortannain,
is a eiseirgi co tend, doclæi diabul, d’airg ifern.

17. ’San domnach mincasc co mbla[i]dh tadbas Crist da aspulaib,
’san domnach, ba moidi a cert, ann doroine gach proigept.

18. ’San domnach a ndeilb theined spirat De gan troimteimel
ar na hespalaib gan c[h]es i ndomnach na cingideas.

19. And dorighni in muintir mo[i]r isin domnach fo c[h]etoir,
noi ngrada næma neime, is iat cæma coimdhili.

20. A ndomnach doraga in brath is a egla fil ar cach,
’san domnach ticfa Crist cain do mes ar sluag[aib] Adaim.

21. I ndomnach De, is mo c[h]en, bertar na næim ar naemnem,
[is] isin domnach De dein ber[t]ar pechthaich a sirpein.

22. Cinnid cain domnaig do reir ar na fathaib sin o c[h]ein,
sæiri do Christ comlan cain, a dæine an domain, denaidh.

p. 145.

23. Nathair neimnech na lam nech, da mbenta ria, bidh aithrech,
dia domnaig tabair di poig, noco denann rit urc[h]oit.

24. Iasg ingnad sirus an sal darab ainm luath libedan,
dia domnaig bith ar th’aire, noco gluais a henbaile.

25. Is mor in mirbuil i sin inni do[g]niat na leomain,
gan comrac atigh no amuich in leith tiagaid dia domnaig.

26. Ciall ingnad innistir ann, fid lomnan do neimh cæmc[h]rann,
se la suas ina suidhi, diá domnaig ’na sirlaighi.

27. Abla tire Barsabe, ubla orro gach raithe,
dia domnaig tiagaid dia coll ’sni bí orro ænuball.