The Death of Mac Con

Author: unknown

Editor: Myles Dillon

An electronic edition


view the header | view the translation | view the Yellow Book of Lecan (MS 1318) on ISOS



p. 341.

(MS p. 205 b)

AIGED MEIC CON ANDSO

1. Baí Lugaid Mac Con trá iar sin tricha blíadna a rígi nÉrenn. Bennaid
banbrughaid is í ro baí isin Temraig ar chind Meic Con. Is fuirri-sen
ruc-som in cláenbreith a Temraig, .i. a cáerchu lodar ar glaissin na
rígna co n-ebert Mac Con na cáerchu do thobirt a n-íc lomartha na
glaisine, conad de sin atá in cláenráith a Temraig. Roba í immorro
breth Chormaic huí Chuind ro fast gina impúd uili-lomrad na caíreach
a n-ícc lomartha na glaisine. Do dlomsad fir Érenn dó iar sin, & do
rígsad Cormac. Ba holc ríghi Meic Con, úair ní baí meas ná torad, ná
íasc a n-inberaib, ná lacht ac loilgechaib [ce]ithre aill, ná tes i
ngrén, na sina a coraib fria gúbrethaib & anúabar Meic Con. Ba lán
immorro in bith do cach maith roime, & ’na díaid ó ro gab Cormac rígi.

2. Luid Lugaid dia thír fesin (iar tain). Is ead didiu dochóid, d’indsaigid
Ailella Úluim co hair[m] a raba, ar dáig co ndernad a goiri, úair is
é Ailill r[od] n-alt. Luid i les co Ailill. ‘Ná heirg,’ or Sadb. ‘Ni dílga[dach]
in fer cusa téigi’. ‘Ragmaid araí coro sígaigem hé & co ndernom
a ríarugad dar cend in móruilc ro fersom fris.’ Luid anund iar
sin. ‘Cía so?’ or Ailill. ‘Mac Con!’ or cách. ‘Fo chen dui[t],’ ar Ailill.
‘Is ed doríachtamar,’ or Mac Con. ‘Fogel ... on,’ ar Oilill. ‘Tair
íarum,’ or Ailill, ‘co tucar beandachtain dui[t], dáig ní mair intí eli
boí imon gním frit .i. Éogan.’ ‘Amal dodénad-som do gaire dogén-sa,’
ar Mac Con. Luid iar sin co tuc póic do Ailill. Danárraid íarum Ailill
co fíacail fidbi (.i. nemi) ina éta[n] Meic Con. Luid úad amach iar
sin. ‘Féi na amai!’ or Sadb aca déchsain. Atbert Sadb in rand sa:

‘Is é forgom dia tuit rí
rod geodain fíacail fhídbi:
do gab súainead do delbad,
ba dirsan in celebrad.’

Ro saí úathi iar sin fón indas sin.

3. Tánic iar sin Ferchis mac Comáin co hAilill. ‘Fé, a Fherchis!’ or Ailill,
‘i ndíaid Lugdach dit & dígail Éogen fair, .i. a bráithir!’ Luid íarum
Ferchis, & berid fair & a druim fri coirthi. Doteilc Ferchis urchar fair
coro fhregair in coirthi tríana étan síar co n-érbailt de. Luid Ferchis
isinn es iar sin, & benaid casnaidi dia gaí, & dosléig úad la sruth na
haba co ríacht co hairm a mbaí Ailill, air is é sin comartha ro gellsom
fríu dia marbad sé Mac Con. Is de sin atá Eas Ferchis. Docer
Ferchis iar sin la fén Find huí Baíscni a ndígail Meic Con.




p. 342.

4. Is de sin asbert Sadb andfocal:

‘Mairg damsa, a Dé, mairg do Chlíu
dia fríth Fer Fí ina éu:
is ed dobéra do don
.i. ir[chor] Ferchis co Mac Con.

Mairg damsa, a Dé, mairg do Chlíu
dia fríth Fer Fi ina dí[u]
is de ro bí Art mac Cuind
la secht maccu Mo Úlaim.’

Maith la hAilill immorro a menma, & is andsin ro ráid:

‘ Trícha blíadna mad co se
órb-sa senóir díblide,
cotom dersaig as mo chess
Ferchis mac Comáin éices’

5. Gabais trá Ailill iar sin ríghi Muman co cend .uii. mblíadna, & nírbo
ferr úair dá roibe ríam reme occa dia ro cuir a lubra & a thróigi de
iar ndíth Meic Con co ndérbailt a ríghi Muman iar sin. Aiged Meic
Con sin. Finit.



© 2007 Thesaurus Linguae Hibernicae

Close this window