The Battle of Airtech
Author: unknown
Editor: R. I. Best
An electronic edition
view the header | view the Book of Lecan on ISOS
p. 174.
CATH AIRTIG SO
4. Ro fhodail thra Cumscraid Meand Macha mac Concoba[i]r
a fherand dia braithrib .i. di claind Rudraide & do cloind
Chonchoba[i]r air cheana amal so. (MS fol. 169d) Dorad do Chonall
Cearnach o thraid Indbir Colpa co Coba .i. Cailli Chonaill
Cernaig a ainm iar tain. Furbaidi FearBand for dib Tefa .i.
Tefa thuaisc[eir]t & Tefa deisce[i]rt. Fir Maland & Fianclair
na Bredcha do Glaisne mac Concoba[i]r. Hirial Glunmar for
Gull & for Irgull .i. fearand Geirg meic Febardil. Fallamain
mac Concobair i Fearnmaig. Maine mac Concoba[i]r for
Loch nErne. Lama mac Concobair for Lamraide. Beanna
mac Conchobair for Corco Oichi. Conaing mac Concobair
for Mudornaib. Fiacha mac Concobair for Aileachthir.
Fearand Dubthaig Daeltengthaig & a da mac .i. Corc &
Conrai .i. Tir Liathmaine & in bail ita Loch nEachach aniu.
5. Ro fogail tra coicead Ulad do cloind Concobair iar sin
iar cenmair & badar techta fon samla sin.
6. Badar maithi Ulad oga rada ba techta doib Feargus
mac Roig do thobairt chucu & a sith do denam ar comad
tresiti iad i n-agaid a namad, ar badar mifholta fer nErind co
mor friu, & badar oca n-argain & oca cerbad & oga marbad do
cach taib. Ranic dono in fis [s]in co Feargus & dorindi a chora
p. 175.
fria hUltaib & naiscis cach dib a chomchadach fri araili .i.
Feargus & Cuscraid.
7. Bai Meadb oc tairmeasc Fheargusa arna ticsead i
nUltaib & ro icfadsi a meic do marbad ar bruidin fris .i. Illand
Find & Fiachna Caech.
8. Luid thra Feargos a moirimirci soir co hUlltaib &
Flidais a bancheli lais. Is i iarum tir conaitecht Feargus .i.
fearand Sualaim meic Roig & ChonCulaind meic Sualdaim .i.
crich Cuailgne & Mag Murthemne & crich Rois & Brud mna
Ealcmairi. Tucad doson in fearand sin & baisin i n-aitreib
indsin corbo marb Flaidais aice og Traig Baile meic Buain
conad de sin dochuaidsiun iar sin co hOilill & co Meidb uair
nirbo maith a aitreb thoir tar eis Fhlidaisi. Conad de sin
fuairsiun bas tre ened Ailella meic Magach.
9. Ro fas cocad mor iter Ailill & Meidb & coiced Concobair
andside im crich Maland, ar do Choncobar dorad hi hi cinaid
ineich ro millead uime ar sluaiged Thana bo Cuailgne. Asbert
Meadb nach tuc disli a fearaind acht do Chonchobar nama.
p. 176.
Adbeartadar Ulaid uile nach licfidis uaithib in fearann mina
cosaintea do rai chatha friu he.
10. Ba hadbal & ba dirim immorro in cocad ro fhas
eaturru de sin. Mor tromthreas tren & mor do echtaib aidbli &
mor do laechaib londguineacha dorochair don chocad sin. Is
don chocad sin araet Ulaid do thoitim im C[h]umscraid & im
Chonall Cernach & in Aimirgin mac Egalsa gabann & im
Fallamain & im Furbaide im da mac Chonchobair. Is de ro
fhas dono bas Cheit meic Magach & Doichi & Moga Corb &
Scannail Ailella meic Magach & Ailella meic Ceit meic
Magach & Cheit bodesin & Belchon Breifne cona macaib.
11. Darcoimlead morsluaiged mor la hUltu de sin i coicead
nOl nEgmacht. ro gobsad for indrad in tiri rompo co rancadar
(MS fol. 170a) crich Airtig Uchtleathain meic Thomantin meic Fhir
Choga do Domnannchaib.
12. Ro thinoilsead dono teora Condachta .i. Fir Domnann &
Fir Craibi & Tuatha Taiden. At ead ann so immorro na hairig
chatha ro badar ac fearaib Ol nEgmacht .i. Mac Cecht & Ceat
mor garg mac Magach & Maine Aithremail & Sanb mac Ceit
& Maine Maithremail & Ailill Brefne & Loingseach Lacha Ri
p. 177.
& Aengus ri Fer mBolg & FearDeichead mac FhirDiad meic
Damain & Aengus mac Aililla Find & Mata mac Guill eileac
& Troga & Flaithri da mac Fhraich meic Fhidaig & Imchad mac
Luigdeach.
13. At iad so immorro na hairig chatha badar ac Ulltaib
.i. Conall Cernach mac Aimirgin & Aimirgin file & Maicne
Chonchobair & Fiac mac Feargusa & Fergus mac Eirrgi Eachbeoil
& Sothach mac Sencha meic Ailella & Fiacha mac Laidgin
ri Fer mBolg & Guala mac Gerig meic Fhaebargil.
p. 178.
15. Dorochair Ailill Ardadach & Scandal da mac Magach
la Conall Cernach. Dorochair dono Ailill Brefne & Loingsech
Lacha Ri leis fosin la cetna. Dorochair Aengus ri Fer mBolg
& Fear Teichead mac Fir Diad la Cumscraid mac Concobair
la rig Ulad. Docher Aengus mac Aililla Find la hAimirgin
mac Ecalsach gobann. Dorochair Mat mac Guill eleoc la hIlial
nGlunmar mac Conaill Chearnaich. Dorochair Troga & Flaithri
da mac Fraich meic Fidaig la Glaisne mac Conchobair. Dorochair
Imchad mac Luigdeach la Guala mac Ge[i]rg.
16. Gid Ulaid dono dorochradar isin chath co mor. Dorubairt
Fiacha & Conaing la Ceat & la Mac Cecht. Dochear Corc
mac Dubthaich Daeltengthaig la Sanb mac Ceit. Robith
Guala mac Geirg la Maine Aithremail. Dorochair comthoitim
isin chath .i. Beanna mac Concobair & Ceat mac Aililla &
Medba.
17. Ro srainead tra iar sin in cath tre neart imbualta &
imgona for choiced nOl nEcmacht & ro len cach a thograim
isin chath iar sin. Ro lean Aimirgin in da Eithiar .i. da mac
Fergusa meic Roig co torchradar comthuitim a nImleach Ai.
p. 179.
Conad iar sin ro thocaibsed Fir Ol nEgmacht mur derg a
n-agaid Ulad iar sin, uair ni leandais Ulaid ar itir acht co
mbeantai mur friu.
18. Is andsa chath sin Airtig do dithaiged Domnannaid
fa deoid. Doroised Ulaid dia tig iar sin co morcoscur leo.
© 2007 Thesaurus Linguae Hibernicae