Gedicht auf Oengus
Author: unknown
Editor: Rudolf Thurneysen
An electronic edition
view the header | view the translation | view MS 23 P 16 (Leabhar Breac) on ISOS
p. 20.
Gedicht auf Oengus
1. Aībinn suide sund amne.
re taeb Eōire ūarglaine
cérsat cūanach nír choī crech.
in Dísert búadach Bethech.
2. Dísert Bethech i-mbói in fer.
gus-ticdis airbre aingel
cathair credlach īar cūairt cross.
i-mbīd ūa Oīblēn Ængus.
3. Aengus a hænach nime.
sund atā a lecht ’s a lige
iss a sund do-chúaid ar ceal.
isin aíne co næmnem.
4. Is i Cluaín Eidnech ro-alt.
hi Cluaín Eidnech ro-adnacht
hi Cluaín Eidnech ilar cross.
ro-1ég a salmu ar tuos.
5. Aengus i carcair chachta.
do déoin maic Dé i Tamlachta
nocharb hí in betha brígach.
isin aíth oc urthīrad.
6. Mīach crūaid leis la tūarcain síl.
re n-eírgi do neoch is tír
tri cæcait salm comall nglē.
.ccc. slechtain cech n-aidche.
7. Fochan foglas tréna fholt.
tuige d findfad tréna chorp
secht mbliadna dó dēoda in cacht.
can cheól is can chumsanad.
8. Nocha-rib sium a cuach cuirm.
Ængus fa doíthech in tsuirn
menic ro-chlói dath a drech.
itir gæith & cāithlech.
9. Luid laithe do buáin feda.
Ængus in bréo dar brega
oca scathad scél co-llí.
benais de in láim soscēli.
10. larsin cáiset co hetla.
na hethaide oirderca
imon uásal immon abb.
mó cech gáir gáir ro-gairset.
11. Tuic sium a laím rea rigid.
Ængus cen oīb n-indligid
ca firt rob aidble fo nim.
slāinte cen on cen ainim.
12. Guided in lāim sin lim sa.
nacham-tair olc na h-innsa
guided sē i n-æntaid anma.
hi comair a chomanma.
13. Do-rīacht sund fer fegtha rann.
grīan īarthair domain Domnann
alt ros-ngab galar in chinn.
alt re-n-abarthar aíbinn.
© 2009 Thesaurus Linguae Hibernicae