The Invasion of Nemed

Author: Anonymous

Editor: Vernam Hull

An electronic edition


view the header | view the translation



p. 120.

The Invasion of Nemed

(MS. p. 67a1)

‘...feraid cath fri clannaib Nemid & combruidhigh bar m-bidhbaig co firata.
Daigendaid & dithlaithrigi iad a cinaid bar [m-b]raithre .. & bar n-uili-charad
ad-bath leo.’

Is ann-sin ad-racht in mor-shluag muiridi sin fri haithesc anbarb[ard]a
Muirc meic Deiled & ad-racht fir Erenn & clann-maicne Nemid fon samla
c[étn]a. Is and-sin do-ferad cath amnus aniarmartach atorro. Fa trom trá
fich & fearg caich fri arairi. Bá hé duire in [chom]roic tra co m-badur do
chechtardib leithib ag tabairt an chatha cona-riacht o nech dib a menma do
beith a feidm eili ’san doman acht beith a fheidm chathaigthi & a chomlaind
conna-rairig and ni ’san doman no-co táinig an ruad-buinne ruathar-borb
rabarta ro-dileanta & ucht-bruinne na tuinne tul-guirmi treathan-gairbi tairrsib
cona-terna duine beo dib cenmota lucht aen-luingi d’Fomorchaib & tricha
trein-fer do chlannaib Nemid. Ro-siachtadur dono lucht na luingi sin an tir
asa-tancadur & do-indisidear a scela o thus co deiredh corbo domenmnach
iarsma na Fomorach don scel sin.

Dala imorro an trichad tren-fher terno do clannaib Nemid dono roindsead
Erinn a tri randaib. Na trí taisig badur acu .i. Beothach mac Iarboineoil
 [ed-on in fhaid] meic Nemid & Semon mac Sdairn meic Nemid & Britan Mæl
mac Fergus Lethdeirg meic Nemid.

Bá hé imorro trian Beothaig .i. miota Thoirinis Muigi Ceidne [.i. an bail
ar-toglad tor Conaing & a-n-dernad an cathugud sin] co Boaind m-banchruthaig
na céd cuan. Trian Semoin o Boainn co Bealach Conglais. Trian
Britain o Bealach Conglais co Toirinis Muigi Ceidne a tuaiscert Erenn.

Beothach dono do-fhalmag Erinn ar tus & is í cch dono a-rancadur ar tus
don doman .i. a n-oirrther-thuaiscert na Lochlaindi Moire corab inti-sin
do-fhodhlaimsid fis & druideacht & amaideacht & eolus cacha ceirdi filidheachta
bai isin doman co-n-deachadur a sein isin n-Gréig Moir corab aisti tangadur
iar m-buaid il-cherd ar slicht a n-athar & a sean-athar d'innsaigi Erenn & dob
iad sin Túatha Dé Danann iar m-bunadus.

Britan Mæl mac Fergusa Lethdeirg is e do-gab a Mainn Chonaing meic
Fæbair.

Dala Semoin do-chuaid isin n-Gréig Moir & cach sil do-geinead uada
do-dærtha la Ggu conad o Semon do-geineadur Gailiuin & Fir Bolg & Fir
n-Domnann conad iad na hiarsmada ro-fhagbadur iar sin a n-Erinn & na-deachaid
leo a Herinn.




p. 121.

Do-rinde an cétna cathugud fa Erinn riu iar scis máir .i. cath Locha Sean-tuindi
a chomainm sein .i. risi-raiter Loch Feabail aniu conad and-sin do-marbad
Feabal mac Fhind meic Firmeand conad uad ainmnigther an loch & cath
Muigi Glais a tir Breis meic n-Ealadan frisi-raitir Mag Tiubhra aniu. O Tibir
ingin Cais Clothaig do Túathaib Dé Danann aderar Mag Tibra ait an-torchair
Glas mac Rigbaird meic Fhir m-Beand rí an tiri o n-ainmnigther Mag n-Glas &
cath-reim Túath Dé Danann re fine Fomórach o sin amach bodeasta conad
don scel sin do-chan Fland fili an duan-sa do chuimnugud an sceoil:

‘Togail Tuir Chonaing co n-gail’ et reliqua.

Finit don Togail.



© 2009 Thesaurus Linguae Hibernicae

Close this window