The Bodleian Dinnshenchas

Author: unknown

Editor: Whitley Stokes

An electronic edition


view the header | view the translation | view MS Rawlinson B 506 on Early Manuscripts at Oxford University



p. 469.

(MS fol. 11a)

IN nomine Patris et Filii et Spiritus Sancti amen sosis.

SENCAS DINN ERINN DORIgni Aimirgin mac Amal[ga]dha, fili
dona Deissib .i. fili Diarmata meic Cerbaill. Is e dorat algais for
Fintan mac Bocra hi Temair dia mbae mordail fer nErinn hi
Temair im Diarmait mac Cerbaill & im Flann Febla mac Scannlain
comarpa Patraic & im Cennfaelad mac Ailella meic Eogain
meic Neill & im Finntan mac Bochrai amm ardsenoir Erenn, & coro
throsc teora laithi & teora aithche for Finntan hi fiadhnaisi fer
nErenn sceo macu & ingena hi Temair, co ndeicsed do senchasa
fira dind insi hErind, fodeig rola cach duine & cach dine di o
aimsir Cessrai na hingine do Grecaib Sceia — is i cetna rogab Erinn
— co flathius Diarmata meic Cerbaill. Unde poeta dixit, Cuan .i.
ua Lochan:

TEMAIR, TAILLTI, TIR n-oenaig.




p. 470.

(MS fol. 11b)

[1. TEMUIR.]— TEAMUIR DIU .i. Muir Tea ingine Lugdach
maic Itha dia luid la Geidi nOllgothach. Is ’na flaith sein ba
bindidir la cach nduine i nErind guth araille beitis teta mennchrota,
ar mét in tsída & in tsamcuiri & in chaincomraic & na cairdine
robai do cach duine fri aroile i nErind, & is airi dano as [s]ruithiu
cach mur .i. Tea-mur, (MS fol. 11c) & is uaisliu cach comarba a comarba,
fobith it e cétna soerchuir doronta i nErind .i. cuir Tea
ingine Lugdach maic Itha fri Gede nOllgothach. Unde Temuir.

is Tea bean Erimoin maic Miledh Espaine roadhnacht
indte, et quod uerius est, ut poeta dixit:

‘IN chetbean luid i n-uaigh uair
don cuan a Tur Breogain bain,
Tea Bregh[d]a, bean ind righ,
dia[na]dh ainm Temuir fir Fail.’

[2. MAG MBREG]— Mag mBregh .i. Brega ainm daim Dile .i.
Dil ingen Lugmannrach, dodechaidh a Tir Tairrngire, a tir
Falga, la Tuilchaine druidh Conaire Moir maic Eitirsceoil maic
Meissi Buachalla. I n-oenuair dano rogenir o mmathair in Dil sin
& ruc in bo in loegh .i. Falga a ainm. Rocar iarum ingen ind
rig in loeg sech na hindile olcena, ar rogenir a n-oenuair fria, &




p. 471.

foremidh Tulchaine a tabairt-si co tucadh a dam le. Robo dual do
side in Morrigan & rogaid-sium di tabairt do na himana sin co
mbeith im-Maig Olgaide .i. cetna ainm in maige, (& rochar Brega
in mag sin). Unde Mag mBregh dicitur.

No comad o Breoga mac Breogain lasro slectad in mag no
hainmnig[the]a, et quod uerius est, et unde poeta dixit:

‘Mag mBreoga, buaid ar mbunaidh,
co Tuaim Trebain cen trelaim,
sindser na laech dar leru,
Breoga, rogab for Bregaib.’

[3. LAIGIN]— Laigin a lagínís uocatur .i. donaib laignib lethanglassaib
dombertsat leo na Dubgaill dar muir anall .i. da cét ar
fichit cét a lín maroen la Labraid Loingsech Moen, mac Ailella
Aine maic Loegairi Luirc maic Ugaini Moir. IS ond Labraidh
sin ille fil grain & geretacht & omun urfuath for Laignib etir firu
Erenn. Ar ba mor ind neim & in duabais & in duaig ro himredh




p. 472.

for Laignib, foraib feisin ri tiachtu adocum nErind. Conid de
asbeir ind rigfili Find mac Rossa Ru[a]idh:

Moen doen obanoed nimbodnos ardri orgg rigu rohud an loech
huae luirc Labraidh lathi duabsi gasait inna lamaib laignai
Laigein iarsin gniset catha cota ler lerga iath nErimoin is arlebur
loicheit loingsech longais flaith Goedal (MS fol. 11d) gabais grib ind rig
iath aneoil ua Luirc Labraid.

Loegairi Lorc, tra, meic [leg. mac] Ugaine Mair, is e senathair
Laigen, unde Laigin dicitur.

No [i]s laigin ordai & airgididi doronsat cerdada Erinn do
Labraid Loingsech dia tudcaid & Ernoll mac rig Danmarg & Indse
Gall laiss. Et is e ro ort in rigraid in nDind [Ríg], conid de na
laigne sin ro imirthea for in rigraid i nDind Rig & for Cobthach
Coelbreg rig Erenn mac Ugaini, & conid o sain alle asberar Laigin
friu, conidh de desin asbeir in senchaid:

‘Labraidh Loingsech, lor al-lin,
ro ort Cobthach i nDind Righ,
cossluag Laignech dar linn Lir
dib rohainmni[g]edh Laigin.

Tuaimm Tenma [a] ainm ria sin
cnuic in rog[n]iad inn orgain:
is Dind Rig o sain alle
ó marbadh na rigraidhe.

Da cét ar fichit cét Gall
co laignib leathna leo anall:
dona laignib tuctha insin
de ata Laigin for Laignib.




p. 473.

[4. MAG LIPHI.]—Mag Lipi, cidh dia ta?

Ni ansa .i. LIPI ingen Candain Curcaig luid la Deltbanna mac
nDruchta, la dalem Conaire Moir riig Temra. A Sid Buidb er
Femin dosaide. A[r] robo alaind leaa in mag dara tainic, ní ro
gaib acht a hainm fair.

Lipi luchair, lor do blaid,
ingen Cannain cetcurcaig:
dia hainm dogar[ar] a mag
dia tudhcaid a tir Temrach.




p. 474.

[5. LOCH GARMAN.]—Loch Carman, cid dia da?

Ni hansa. Garman mac Bommallecce robaidedh ann la Catháir
Mor ri Erenn, [uair rochoill in Garman] a rechtga & a dirgedetaid
imme oc Feiss Temrach .i. mind oir na rigna tall a Tig Midcuarta,
& nomarbadh a mmuintir, ar ba dibergach & foglaid he.
Unde [poeta:]

Mac Boma lecce luaidmi
in ri Cathair romm-baidi,
Garmman a ainm in ardfir
tria bairdnib cona bad ri.

No comma Carmman Glass mac Degad on n-ainmni[g]der,
cuius frater Dea a quo Inbir nDea & Abann Dee hi crich Cualann.

[6. FID nGAIBLI.] — Fidh nGaibli, cid dia ta?

Ni ansa .i. GABOL mac Ethamdain maic Eciss tall grinne
nAnge ingine in Dagdai rotheclainn side do denam drochtai di,
ar in droctai donidh in Dagda (MS fol. 12a) ni anad do tinsaitain cen
nobidh in muir for tuile, ni t[u]ctha banna ass cein ba haithbe




p. 475.

ann. Tarlaicc erchur iarum Gaible don grinni sin a Beluch
Fu[a]laiscaig corragaib foss, & co forbairt in chaill ass for cach
leth; conidh de sin ata Fidh nGaiblie innossa.

Noo, dono, ón dub abaind dianidh ainm Gobul fil i rind da
cluana .i. Cluain Sasta & Cluana Moir, & tiruirthes tria Fidh
nGaible, ut ipse Berchanus dixit:

‘IS inmain in Gobul-sa,
is uaidi [a] ainmnigud
for leith ind feda-sa,
a rad ni ró:
in gem-sa charmocail,
i n-ucht na cluana-sa,
tall sluagh mor fó.’

et quod est uerius.

[7. MIDE.]— Mide, mac si[d]e Brata maic Deatha. Is air ba
Midi a ainm, fodaig is e roata tenidh i n-Erind i tossach ria tascar
clainde Nemid, co ro leath fo Erind uile, & co raba secht mbliadna
for lassad, conidh on tenidh sin rohadnadh cach primteni [&] cach




p. 476.

primtellach i nErind, conid[d]esin dli[g]es a comarba [miach la
muic] cacha cleithi i nErinn, co nderbratar druide Erenn: ‘Is
mide duin in tene-sa rofatad isin tir.’ Luidh Mide & bentais a
tengtha a cennaib na ndruadh, & dobeir leis co mbatar hi talmain
Uisnigh fo suide. Conid ann asbert Eriu ingen hUmoir, muime
Mide isede: ‘Is uais neach atat[h]ar sund [innocht],’ ol sisi.
Unde Uisnech & Mide dicuntur.

[8. EITHNE.]— Eithne cidh diata?

Ni ansa .i. EITHNI, INGEN ECHACH Feidlig, máthair Furbaidhi
maic Concobair maic Nessa, dochoidh o Emain Maiche
siar com-Meidb Cruachan dia hassait, fobith asbert in drui fria
Clothraind mac a seathar dia marbad. Luidis dano dia fothrucadh
isin abaind, co tard in sruth buille fuirre, co ros-baidh.
Luidh dono Lu[g]aidh Mac con, co tucc in mac trena toeb
ammach .i. Furbuide, & is de sin ata Eithne for[s]an abaind &
Carnn Furbaidi uastu sede. Unde poeta dicit:

‘Eithne máthair maic in rig,
ingen Echach Feidlig fír:




p. 477.

treithi tallad, borb in maid,
Furbuide mac Concobair.’

[9. BRI LÉITH.] — Bri Leith, cid diata?

Ni ansa .i. LIATH MAC CELTCHAIR Cualand, mac flatha as
coeme boe a sith nErind, rocarastar Bri Bruachbreac ingin (MS fol. 12b)
Midir Morglondaig. Docoidh o ingenraid co mboi ic Fertai na
nIngen h[i] toeb Temrach. Lotar na macoíme immach co
Tulaich na hIarmaithrige, & nir’ lecseat tableore sida Mideir
secha sin, ar ba lir bechtheillinn il-lo ainle [imfrecra] a ndibraicthe,
co ro brissed ann Cachlan gilla Leith, [co n-apad. Imsói in
ingen do Brí Leith, co ro bris a cride inti,] co ndebairt Liath:
‘Cenco roussa in ingin, is mo ai[n]m sea bias fuiri.’ Unde Brí
Leith & Dind Cochlain.

Liath mac Celt[ch]air Cualann coir
carais ingen Midir móir.
Bri Bruachbrecc, buadach co mblaidh,
nistas rainic mac Celt[ch]air.




p. 478.

[10. TONN CLIDNA.] — Tonn Clidna, cid dia t[á]?

Ni ansa. .i. CLIDNA INGEN GENAIND MAIC Triuin dodechaidh
a Tulaigh da Roth, im-Maig Mell Tiri Tairrngiri la hIuchna
Ciabfhaindech do rochtain Maic ind Oc. Dorat sede breic immpe.
R[os]hepain ceol di isind noidh credumai a mboi, conatuil fris &
[im]roi a seol frithrosc co tudhchaidh timcell nErind fodes, co
toracht Clidhna.

Is e tan connuargaib in murbrucht nemforcennach co ro
scaile fo cricha in betha frecnai[r]c. Fodeig roptar he tri mortuile
Erind ind inbaid sin. .i. Tuile Clidna & Tuili Ladhra & Tuili Bale.
Acht ní [i n-]aen uair conuargaibsit. Robed in tuile meodonach
Tuile Ladra.

Dorimmart tra in tuile i n-ardda & fodaili fo tir nErind, co
tarraid in curach út & ind ingen ina collad ind, forsan tract, cor’
baided ann sin Clidna Cruthach inge[n] Genainn. Unde Tonn
Clídna.




p. 479.

[11. SLIAB BLADMA.]— Sliab Bladma cid diata? Ni ansa .i.
Bladma Blod mac Con maic Caiss Clothmín romarb buachaill
Bregmael gabann Cuirchi maic Snithi rig Ua Fuatta. Doluid
iarum ina noedin corro gab h[i] Ross Bladma. Ross n-Air a
ainm artus. Doluidh assen isin sliab. Unde est Sliab Bladma.
Unde poeta dixit:

‘Blod mac Con maic Caiss Clothmin
romarb buachail Bregmail bain,
gabann Cuirche moir maic Snithi,
rogab hi Ross Tiri inn air.’

is e Blodh mac Breogain is marb ann & is ua[d] ro hainmniged
mons Bladma.




p. 480.

[12. MAG RAIGNI.] — Magh Raigni cid dia ta?

Ni ansa .i. RAIGNE ROMANACH DODECHAIdh a tirib Roman,
& ruam & bacc fri aiss, iar tuaslugadh in murgabail im Thorinis
nglain hi tirib Franc, fri tri la. Adagastar opair n-aile samlaid do
tabairt fair. Roteich iarum có toracht co hImlech maic Echonn.
(MS fol. 12c) Robo druim fidhbaide uile essen, co ro selaigh Roigne he
dia bacc & dia ramaind. Unde Mag Roigne.

Esé roselaigh in magh
[Roigne] ro nirt, Romanach,
dia luid a Torinis tair
for elud, for imgabail.

[13. TETHBA.] — Tethbfa cídh dia ta?

Ni ansa. Teathfa ingen Echach Aireaman roscar mac




p. 481.

Nectain Findgu[a]laig o Loch Lein, Noisi a ainm. Roboi a
muime side Eittech ingen Lennglaiss maic Luind, de Glomraide
Tracta Tuirbi dó. Dochoidh la Tethfa & la Noissin mac Nechtain
Findgualaig, co toracht Ard n-Umai. ‘Bid tesbaid do cumtuc[h]
in tire-se mo dula-sa ass,’ ol ind ingen.

‘Ni ba fir son,’ ar a ceile, ‘ar ni teiseba do slonniud don tir.
Acht bid teidmnech ind ail brethri facbaisiu forsin tir sea.’

‘Fot-lile cuma de,’ for seat.

Ba fir son disi, daigh atbath Etteach oc dul fodes .i. Ettech
ingen Len[n]glaiss. Unde Tethba & Cenn Ettigh:

Teathb[a] toga ban co mblaidh
ingen Echach Airimain:
hisin tir contoisi thair,
ros-car Noissi mac Nechtain.
atbath Eittech ingen Glaiss
a Cind Etteig dia hingnais.




p. 482.

[14. LOCH ANNIND, LOCH UAIR, LOCH CIMMI.] — LOCH ANNIND, CID DIA TA?

NI ANSA .i. Ainnind & Uar & Cimme Cethircenn, tri maic
Umhor, do rigaib Fer m[B]olc. Do Greccaib al-lethcinel .i.
Grecus mac Point & Danaus mac Point. IS e dano Danaus
sen Fer mBolc. Rogab ciniudh indala fir fortamlas ar aroile,
con na ro leccsit in t-uisce sommblasta doib, fodaig is commus & is
cacht bis hi tirib Grec for ind usci, & adachta fo doire .i. uir do
taroidiud (sic) for lecca loma co mbetis secht cubaid in domni
uire forraib.

Dodechatar iarum riasin cumachta moir sin dochum nErind
for eludh, & gnisit barcca doib dia mbolcaib, co tudhchatar co
tirib Erenn & gabsat hic lochaib firuiscidib lochdoimnib lindglanib.
Aindinn ic Loch Aindinn a Midi. Uar ic Loch Uair am-Miide
& Cimmie la Connacta:

Triar brathar, ba buan a ngloir,
tri maic ardgasta Ugmoir,
Ainninn, Uar am-Midhe annu,
ocus Cimme a Conactu.




p. 483.

[15. BERBA.] — Berba, cidh dia ta?

Ni ansa .i. Berba his inti ro laitea na tri natracha batar a
cridi[b] Meich[i] maic na Morigna, iarna bass do Mac Cecht im-Maig
Meichi. Mag Fertaigi dano ainm (MS fol. 12d) in maige sin prius.
Delba tri cenn natrach batar for[s]na tri cridib batar im-Meichi,
& mina tairsedh a bas no oirbeordais na nathracha ina broind
cona facbadais anmanna beo i nErind. Coron loisc Mac Cecht
iarna marbad i Maig Luadat, & coro la a luaith lasin sruth út, co
rom-berb & coro dileag cach n-ainmidi do anmandaib bai inti.
Conadh [de]sin ata Magh Lu[ad]at & Magh Méichi & Berba.
Unde poeta dixit:

‘Cridi Meichi, cruaidh in cned,
isin Berba ro baided:
a luaith iarna loscadh lib
rocuir Mac Cecht cétguinigh.’

[16. MAG FEMIN] — Magh Femin, cid dia da? Ni ansa. .i.
FEMEN canas ro hainmnight[he]a?

Ni ansa .i. Femen dano & Fera, da derbrathair .i. da mac
Moagaib maic Dachair do claind Bratha maic Deatha. Oen bacc
& oen sluasat iairinn etur[r]u andis. In trath nobid Femean ic




p. 484.

fuilged nobidh Fera hic baccad. In trath nobidh Fera ic baccad
Femmen dono ic fuilged, & foceardad cectar de a mbacc & a
sluasait inna himputh techta dar in mag hir-Rae n-Urchuir dialailiu.
Unde [Mag] Femin & [Mag] Feara.

Femen, Fera, fir fatha,
do sil delbglan Deat[h]a,
is eat doslectsat nammaig,
Fera, Femen a fidhbaidh.

[17. SLIAB MIS] — Sliab Mís, cidh dia da?

Ni ansa .i. .i. MIS INGEAN MAIREDHA, siur Eachach maic
Maireda roan do eiss a himirge dia luid la Congancness mac
nDedad. IS ed dano forba & atharda forsa rir a fine & a aiccme,
forsin sliab ut. Unde Sliab Miss dicitur:

Miandais Miss co mbruachaib [bla,]
ingen morglicc Muireda,
deis a himírce gan geiss
lasin coemgein Congancneiss.




p. 485.

[18. LOCH LEIN.] — Loch Lein, cidh dia da?

Ni ansa .i. LOCH .i. Lein Linnfiaccla[i]ch maic Bain Bolgaig
maic Bannaig, cerd sen Side Buidb. Is e romboi fo loch ic
denam niamlesstair [Fainde] Foltlibre ingine Flidaise (MS fol. 13a).
Iar scur a opri cach n-aidhce [focheirded] a hindeoin uad [co
hIndeoin na nDeisi] cosin feirt, & na frasa foceirded iarsin din
muin it eat na nemanna rosilat ann di. Nithnemannach dorigni
a cetna oc slaidi cu[a]ich Concobair maic Nessa a [th]uaid. Is
do sin ata [Loch] Lein & Ind[eo]in na nDeissi. Unde Loch Len.

Len Linfiacclach mac Bain Bolcaig
fo Loch Lein lindiacac (?) leir.
cerd cen ciargestul, cen cain,
fodail niamlesstair fo neim.




p. 486.

[19. SLIAB CUA.] — Sliab Cua, canas rohainmni[g]ed?

Ni ansa .i. Cua Cennmar mac Broccalaig Cringluinig, dalta
Boibli maic Birurchai. Tainic boar mor i nHerinn i n-aimsir
Congail Clairingnig, cona frith act oen tarb & oen samaisc i
nGlend t-Samaisce [Ac Boibli dano robatar sain]. Rofoeided gach dalta a denus dia coimed.
Intan doroact Cua Cennmar cuairt a commeta rofell foraib.
Ros-ruc leiss co ndernai brothlaig foraib, & dos-fuaid isin tsleib.
unde Sliab Cua.

Cua Cennmar co cruth cain,
mac Br[o]ccalaig Cringlunma[i]r,
da[l]ta duaidh a boin ’sa tsleib:
robo dalta co ndallceill.

[20. LUIMNECH.] — Luimnech, cid dia ta?

Ni ansa .i. LUIMNECH de asberar dia rofas in [i]mmarbaig
etar na [dá] fhéindid, robatar ic rígh Muman & righ nOllnecmacht.
Rind & Foeb[ur] a n-anmann, da derbrathair eat andis .i. da mac
Smucaille maic Baccduib. Rogab indala n-oi amsai mBuidb
a Sidh Femin a Mu[m]ain. Gabaiss alaile amhsaige hOcailli




p. 487.

Connachtaib a Síd Cruachan int[sa]inruth. Con tardsat a ceird
múchtha for aird con targlamsat dail móir imon cocrich andes &
atuaith immun n-inbir, gac[h] laech co lumain i cechtar na da dal.
Foruabratar cluiche imon sruth. His e sin tan tainic a thuile lais
oc tindtud, conid and atbertatar na derccaide san chan im sruth
na Sinda de Tul Tuindi co n-athi buille: ‘Is luimnechda in
t-inbiur!’

intan batar na trenfhir ic imargail con tompacht tonn tuile
a sciatha dib, co ndebratar in da rig don cnucc dianidh ainm
Tul Tuinde: ‘Is luimnechda’ .i. i[s] sciathach ‘in t-inber
indorsa,’ ol seat.

Isi sein dano in cocrich cert in da coiced, unde Luimnech
dicitur.

Dia da Luimnech, liss na long,
isam cuimnech cen imroll;
dia sui in sruth, cen tiacra cnedh,
sciatha mora na miled.




p. 488.

[21. SLIAB nECHTGA.] — (MS fol. 13b) Sliab nEchtga can[as] rohainmniged?

Ni ansa .i. ECHTGA hUathach ingean Aurscathaigh maic Tindi
Truim do Tuathaib Dea Donand. Is ann ro alt, hi Cúil Echtair
hi toeb [Síde] Nenta, la Moach Moelchenn. Roboi deogbaire Gaind &
Sengaind oca cuingid. .i. Fergus mac Ruide Lusca Beist. Is arai
asberti Lusca P[ei]st de fobith peist ro alt assa lusca .i. assa
noedendacht, inna medhon.

Rofáim ind ingin feiss dano leissium fodaig feraind cuchchaire &
deoghbaire boi ina laim o ri n-Olneccmacht .i. o Moen co fairrgi
insin. Ni boi dano innmais laiss & boi ferann. Boi, dano, innmais
lasind ingin & ni boi ferann na horba, & issed connaitecht
fair .i. fother fossad cona febaib. Roherbad di assliab ut .i.
Echtga, & bertair di bai ann indorsa .i. bó anntuaith & bó annddess,
& beridh in bó atuaith trian mblechta sech in mboin andess.
Unde Sliab nEchta.

Echtga Uathach os gach blaidh,
ingen airdairc Urscathaig;
si conaitecht sliab nach slait
for Fergus ’na turfochraic.




p. 489.

[22. MAG nAIDNE.] — Mag nAidhne, canas rohainmni[g]ed?

Ni ansa .i. Aidne mac Allgubai maic Eithriuil, is e cetfer noatad
tenidh ar tus dogres ria maccu Miled Espandai in gach baili i
ngabdais longport, fobithin ni ba hecen dó acht a basa for araili
dogrés, co teigtis crithri tenidh tennalda a suilib a mér, commdar
meide fiadubla adnui hi tus a mbuana, conid he sin slechtais in
mag. Unde Mag nAidne dicitur. No comad ’ar n-ecc ann
nohainmni[g]thea, et quod est uerius.

Mac Allguba, bai da brig,
meic Eithriuil aibda airdmin,
cedna toisseach tricheim tenn
reia macaib Miled mortenn.

[23. PORT LAIRGE.] — Port Lairge, canas rohainmni[g]ed?

Ni ansa .i. Fectas doluid Roth mac Cithing, maic rig Insi




p. 490.

Aine a tirib iath Fomorach la hairchind tiri do chu[a]ird a
coicriche, co cuala [inní] .i. dord na murduchunn do Muir
n-Icht. Is ed in fuath atconnairc .i. in murduchund fo deilb
ingine mac[d]acta. Is blaithem [u]as lind & ichtar brotharluibnech
bíastaide fothi (MS fol. 13c) fo lind. Co n[d]uadar na biasda he, co
ndaralsat he ina aigib, co ruige in fairge a da lairg cosin port
hut, & no[t]hallad da[il] céd for mael gach cnama. Unde Port
Lairge dicitur.

IS de gongarthar in cuan
Portt Lairge na leburtuagh,
ann frith laarg, lithaing lir,
Ruith maic Cithaing cetguinig.

[24. SEIG MOSSAD.] — Seig Mossadh canass r[o]hainmniged?

Ni ansa .i. Mossad mac Main maic Fleiscci Findi fofhu[a]ir in
seig im-Muigh Eoin. Rom-biath & roforbairt co n-ithed na
groighi & na tainte & na daine deissib & triaraib, & o na fu[a]ir
fodeoidh ní condeossadh conimsoi fria aite .i. Mossad .i.
Mossad mac Main isan maig. Unde Mag Mossadh & Seig
Mossad.

Mossad mac Main, grinne gel,
mac Fleiscci Findi, fo fer,




p. 491.

alais seig fri seilc subaigh,
robo mein rí mor-fubaid.

[25. MAG MAIN.] — Mag Main, cidh dia ta?

Ni ansa .i. Moen Morgnimach fer berrtha berrthoir mac
Miledh, is e cétna fer no ber[r]ad i nEirind .i. iar tascur mac
Miled. Is e dano cetfer roberrad i nErind, Fobarr Foltcain. Is
e dano cedluag berrtha tuccad artus i nErind .i. Ber[r]amain .i.
ferann i cumain a berrtha. Marb dano im-Muig Moen cen brec.

comad il-log a berrtha taithi in mag ac caillig tantum,
conid de sin ata Moenmag & Berramain.

No comad il-logh a berrthorachta do Maen do bertais Maic
Miled Berramain do Moen. Et quod est uerius.

Ba marb Moen co mine ngal
for Mag Main atcu[a]lamar:
fo[fh]uair cen debtha tre baig
il-log berrtha Ber[r]amain.




p. 492.

[26. ATH CLIATH LA CONNACHTA.] — Ath cliath la Connactu,
canas r[o]hainmniged?

Ni ansa .i. Cliath sciach & droigean dorigenseat na secht
Maine .i. secht meic Meidbi Cruachan .i. Maine Aithremail &
Maine Máthremail & Maine Mingar, Maine Morgor, Maine Anndae,
Maine Mo-epert .i. mo a choimpert & a adbur, Maine Condagaib
uile, & Crochen Croderg inailt Edaine — is uaithe ainmni[g]ter
Mag Cruachan. It eat sin rolasat na cliatha (MS fol. 13d)
fria hocu Muman ic tabairt tana bo Darthada ingine Gegamain
(sic). Dodos-farraid cobair iardain a Cruachain. Unde Ath Cliath.

Na secht Maine, linaib gal,
gniset fri feraib Muman
cliatha draigin, data tra,
for tánaid bó Darthadha.

[27. MAG CRUACHAN ] — Mag Cruachan, canas rohainmniged?

Ni ansa .i. Cruachu no Crochen inailt Etaine dodeochaidh




p. 493.

for aithedh la Midir Bri Leith a hOenuch Oengusa. Robo cara
do saidi Sinech Sidi Cruachan. Taraill leiss ara dili dia accallaim.
Forfostait i suidiu. Dorumenair Etain co mba la Midir in sid sin.
‘[In hí] do treb-su inso?’ ol Etain. ‘Acc son,’ ol Midir, ‘is
ness[a] sair do turccabail gne bail mo treibi-se,’ ol Midhir, ‘inda
inso.’ ‘Ceist, ciaso buaid duinne tadall in tsída sa?’ ol Crochen.
‘Bidh th’ ainm bias forsin mag sin, co bráth .i. Magh
Crochan,’ & is de sin fil Raith Maige Crochan .i. do Crochain
inailtt Etaine, fodaigh robo croderg, [in cenn bai fuirri] cona habraib
uile acus a habratchur. Unde Mag Cruachan.

Crochen Croderg, cruthmar, caem,
inailt Etaine conna[i]g,
dia luid la Midir Bri Leith
isi fo[fh]uair na deithi in raith.

[28. MAG TARBGAI.] — Mag Tarbgai canas rohainmni[g]ed?

Ni ansa .i. do comrac & do gleicc na da tarb .i. Findbennaig
& Duind Chuailnge ia[r] tabairt na tana im Chnoc Tarbgai.
Unde Mag Tarbgai.

Findloch .i. loch Findbennaigh, do bas ind [Fh]indbennaig
on Dund Chuailgne isind loch, conid[d]e asberar Findloch. Unde
poeta dixit
:




p. 494.

‘ Mag Tarbga canas roraidéd?
do gleicc na tarb tennsaiteac[h]:
tria bass in Find do mormoch
de dogarar in Findloch.’

[29. LOCH NEILL.] — Loch Neill, canas rohainmniged?

Ni ansa .i. Niall mac Ennai Aignig, maic Aengusa Tuirmigh,
maic Ailella Caisfhiaclaich, is e ropo toisseach dibergach nErenn
i flaith Conaill Cromdeirg maic Labradha Luchta. Dodeochaid
for lurg mucc nDreibrinde dia lotar a Sidh Collamrach condasfuair
i nDairi Tarbgai. Imrachtatar na mucca reimib eitir conaib
& firu iar futt Maigi Ai, fodaig rop ead ainm con Ennai Aignig
[Feib rancatar in loch] (MS fol. 14a) robaded Niall ann & a coin & a
dibergaig. Unde Loch Neill.

Robaidhedh Niall cétaib cenn
for lurg do mucc, a Dreibrenn;
robo primhcelcgach, tor tenn,
toseach dibergach Erenn.




p. 495.

[30. MAG LUIRG.] — Mag Luirg, can[as] rohainmniged?

Ni ansa. Na tri Ruadcoin Mairtene is as rogabsat lorg Conaill
[Cernaig] maic Aimirgen, a Muig Luirg co Mag Slecht i
mBrefne. O ronn-ortsat rucsat a cenn leo fo dess co crich Corco
Laigi, condas-fil a mBrefni nunc.

Marbsat na Rua[d]coin i recc
Conall Cernnach na cruadhgleacc:
lensat o Maig Luirg ille
co m-Mag Slecht na sidgaile.




p. 496.

[31. LOCH nDECHET.] — Loch n[D]ecead can[as] rohainmniged?

Ni ansa .i. Dechet rathmogaid Glaiss maic Caiss, is e tuargaib
Suidhe nAeda uass Eass Ru[a]id. Iarna denam a opra dó la
hAedh Ruadh mac Baduirnn maic Maine Milscothaig rocuindigh
loog a oipri .i. torud ind essa. Dobert do arna beith imressain
do feraib Olnecmacht im torad Essa Ruaidh. Is aire tuarcaibad
in tor la clainn nAilealla. Robai ic[c]uingid [d]uilgine na hopra
dorigni. Dobreith dó go Mag Lunga .i. co Mag Loingthi, fobith
is ann roloing for a biud & for a lind, co mba mesca medarciallmar
do lind, do loim, do eanbruithi, do iasc. Doluid iarum for
baili[g]ud meraigthe, co riacht in loch & coram-baidedh ann,
conid desin adberar Loch nDechet, ut fabule fer[u]nt.

Doluid Decet for bai[th]chai,
iar tomailt a loingthe lae,
for buaidri, cen gairi nglecc
corom-baidea Loch nDecet.

Unde Loch nDechet dicitur.




p. 497.

[32. LOCH CON.] — Loch Con, canas rohainmni[g]edh?

Ni ansa .i. coin [Manannain] Maic Lir & conairt Modh o tait
Insi Modh, co comrancatar immon muicc rocriathair (.i. rofasaig)
a tir impu .i. Insi Modh. Mani etraintis in choin in muicc ropad
chriathar lea co hAlbain [.i.] ropad fassach. Roleblaing [in
mucc is]in loch risna conu. Cengsat in choin ’na degaidh.
Ro[du]s-immart doib forsind loch, & ni terna cu i mbethaid uaidi
cen tescad & cen badudh. Doluid in mucc iarsin cosin n-insi fil
[forsin loch]. Unde Loch Con & Muic-inis.

Cuanairt Manannain maic Lir
ocus cuanairt Modh mormir
ros-mudaig muc dia gibis
ic Loch Con, ic Muicc-inis.

[33. SINANN.] — Sinann canas rohainmni[g]ed? Ni ansa .i.
(MS fol. 14b) Sinann ingen [Lodain] Lucharglain a Tir Tairngiri
dodechaid do thipirait Condla fond [fh]airge .i. tipra fo’tait
cuill & immais n-eicsi & colla ai & imsa écsi uasa, & i n-oenuair
bruchtas a mess & a mblath & a nduille: a n-oenu[a]ir dofuitet
i n-oenfrois forsin tiprait, co turgaib rígbroind [do bolgaib]
corcarda fuirri [co cocnait na bradain in mes sin, conad he sug na
cnó cuirthear suas ina mbolcaib corcardaib,] co mbruindet secht
primsrotha asin tiprait — imso topur n-eicsi la cach n-ae — co
soann cach sruth frithrosc co tici in topur.

Docoidh iarum ind ingen do saighid ind imais, fodaig ni thesta




p. 498.

ni fuirri acht soas namma. Doluidh iarum ind ingen lassin sruth
co tici Lind Mna Fele, [& traghais in topur, & rolensi co huru na
habann] Tarrc[h]ain. Immasroi iar suidhi, co tarla a tarr [faen]
fuirri, & roblaiss bass iar tiachtain in tire centaraig.

IS de sin ata Sinann & Lind Mna Fele & Tarrchain.

Dolluidh Sinann cuairt cachta
dochum topuir tormalta,
ro[s]tib tond cen tuillem te,
nir’ bo tuilledh comraichne.

[34. DRUIM CLIAB.] — Druim Cliab is ass araile ainmni[g]ud.

Ni ansa .i. Druim Cliab .i. is ann dognitha cleib churaig
Curnnain Cosduib, dia luidh do togail Duine Barc for Ainnle mac
Loai Lamfotai, dia mboi bliadain co leith occu.




p. 499.

Is annsin adbert Cornnan Cossdub mac Reodoirchi iarsin
togail: Is ní ní dia tiagat fir. Amail atbert:

Mac Reo doirchi datta
hua Curnain cruaid cennfatta,
rogni cliabu, cian rocloss,
hi nDruim Cliab di[a] mboi ar tuross.

[35. NEMTHENN.] — Neimethenn canas rohainmni[g]ed?

Ni ansa. Neim thenn doratda ann do ceithri maccaib fichet
Fergusa Leithdeirg la Drecuinn ingin Calcmail, co nderbladar
de a n-aenu[a]ir uile. Conid desin asberar Nem[the]ann. Unde
dicitur in Capturis Hiberniae:

Ceathrar ar fichit, ni gó,
da fer dég sin coba dó,
cethrair sin, calma in cuing,
rodosmarbtha la Drecuinn.




p. 500.

[36. BOANN.] — Boann can[as] rohainmni[g]ed?

Ni ansa .i. Boann bean Nechtain maic Labrada maic Namhat
dodeachaid lasna deogbairib [dochum in tobuir] a hurlainde in
duine. Cach n-aen no tegeadh chuicce ni teigedh uadha cen
athais. Badar heat a n-anmanna seo tra batar ic Nechtain .i.
Flesc & Lesc & Luam. Menbtis iat [Nechtan &] na deogbaire tra
rístais dochum in topair, ni thicfad nech daenna uada cen athaiss.

Luid iarum ind rigan la huaill & dimmus dochum in topair, &
asbert nad boi occa do nach diamair no do nach cumachtu mani
coimsedh aithis for a deilb, & dosaig for tuaithfiul in topuir fotri
do airi[g]ud a cumachtai in topuir. Maidhid tri tonna asin topur
tarrsi, coro immidh (sic) co ro-obann (MS fol. 14c) a des-sli[a]sait & a
dess-lam & a des-suil, & is iarmo roteag assa sidh for teichedh na
haitisi & for teichedh in topuir iarum, co riacht in muir .i. in
t-uisce ina diaid & ros-baid i n-Inbiur Bonne. Unde Boann &
Inber mBonne.

Dia Boann broga Breag
brissis cach fal co find-lear,
ba Boan[n] a hainm fria la
mna Nechtain maic Labradha.




p. 501.

[37. DUBTHAIR.] — Dubthair can[as] rohainmniged?

Ni ansa .i. id est Dubthir nGuairi maic in Daill insin, iarsindi
dorigni fingail for a brathair oc Daiminis, for Dairine nDubchestach
mac in Daill .i. a marbad ar tnuth & ar tha[n]gnacht, co ro leith
fidh & mothar dara ferann, conad desin asberar Dubthair.

Romarb Guairi Dare ndond
cen naire, ni rim rocholl,
mac a athar, adbal bét,
issa marbad tria drochét.

[38. DUIBLINN.] — Duiblinn, canas rohainmni[g]ead?

Ni ansa .i. Dub ingen Roduib maic Glais Gamna roboi i fail
Endai maic Noiss hi Sidh Forcarthan. Rocarastar sen Aide
ingen Ochinni maic Cnucha. Ron-fitirse a mbé n-aill boi inna
farrid. Doluid Aide etir fairge & in sruth [ ] co rambruinded
acht fo thir co ndechsat tar Cnucha.

Rofairigestar Margen[e] gilla Ochindi sen. Doleicc sede uball
cliss boi ina laim, co torchair nert in builli fuirri & doroich in
tuili tairrsi. Unde Duiblind & Ath Cliath Margene, fódeig is
annsin docer a urchar hisin n-ath.

Dub ingen Roduib ri[nd]glain
maic Glais Gamna glanhidhnaig,
romertain Mairgen mer mind,
ba gilla ardmin Ochinn.




p. 502.

[39. SLIAB MAIRGE.] — Sliab Mairige, canas rohainmni[g]edh?

Ni ansa .i. Marg mac Giuisgcaigh maic Ladan Luachra,
rechtaire rig na Fomoire .i. Cenntar-cluass .i. cét cluass boi for
a foroesin. I n-aimsir Echach Muiniste rig Lagen dolluid
docum nErind do tobhach a cissa. Rotarclamsat Laigin a ciss
rechtaidhi do co Belach nDeind. Rainig dono immad bidh dó
& ní ranic nach lind, conda-gab dene im tomailt a bid. Duaid
dano in carnna commor & é tirim. Dos-fanicc ro-itai dó conecmaing
tart (MS fol. 14d) bragad dó, co tarlaic a cenn fri cenn in
tslebe, co nderbailt de iarsin. Unde dicitur Sliab Mairgge.

Marg mac Giusccaig cen gnim ngle,
mac Ladain Ruaidh rechtaire,
rontart a braga cen buaiss
for cuairt cana Cenntarcluais.




p. 503.

[40. CRECHMAEL.] — Crechma[e]l nomen siluae, canas rohainmnegh[ed]?

Ni ansa .i. Crechmhael druth Ennai Cennselaig righ Laigen
dorochair [and] o[c] gabail algaisse do ingin macdachta .i.
Sempait ingen Bethrai. Fos-fuair in druth oc imain a cethra do
etrudh, fódaigh roboi i cuairt foigde in druth as gach tir inna
roille. Rola laim ar ind ingin dia foreicniud. Imsai friss ind ingin
co ndorad beim dia buaraigh ina cloiccind, co ndernai sliccrig dia
cind. Unde Crechmael.

Sampait ingen Beathra buain,
dia mboi [ic ingeilt] ic a buaib,
nir’bo lethmael in lubair,
romarb Crechmael caembrugaid.




p. 504.

[41. LIA NOTHAIN.] — Lia Nothain, canas rohainmni[g]edh?

Ni ansa .i. Nothan cailleach di Chonnachtaib, & ni ruc a
gnuiss riam for machairi o rogeinir, & batir lana tri coicait bliadan
di. Doluid a siur fecht n-an[n] cuici dia hacallaim. Sentuinde
a hainm, Sess Srafais a fer .i. Senbachlach ainm ele dó. Unde
poeta dixit
:

‘ Sentuinne ocus Senbachlach
rop seiss [s]rafaiss a crinfess,
acht nocon adrat Mac nDé
nocon fagbat a primless.’

A Berri dano lotar di[a] hindsaigidh, dia hidnacul for machairie
dia cetamuin. O’tcondarc sí in mag mor uaidhi rofeimdes uaidi
dul arculu, & roclann liic annsin hi talmuin, & benais a cenn fria
conattuil imm & ba marb. ‘Bid si mo ecnairc lasa muinntir
asberim foclannaim do raith mo anma.’ Unde Lia Nothain.

Nothan ingen Chonmair chain,
caillech cruaidh di Connactaib,
a mis cetemuin, ngluair nglic,
is i fo[f]huair in ardlicc.




p. 505.

[42. ESS RUAID.] — Ess Ruaidh, canas rohainmni[g]ed?

Ni ansa .i. Ruad ingen Mane Millscothaig maic Duind Dessa
doroega Aedh mac Labradha Lessbricc maic Roga Rodaim. Is
ass tanic, a hIllathaig Maige Moin i curach (MS fol. 15a) Abhcain eiccis.
Luid la Gaeth mac Gaisse Glaine d’Oenuch Fer Fidgae. Tuargaib
a seol forsin curuch credumai ind ingin a hoenur & dolluidh
cosin inbiur, conoss-acca Aed isin t[S]uidiu forsa raba. Ni
fitir ind ingen cia tir indas-tarrla co cuala dord saimguba isind
inbiur nach cu[a]la nech aile riam and. Adbert ind ingen: ‘Bid
he inso inber bis ainiu i nErind.’

Ruadh ba rigan cosin mblaid,
ingen Maine Millscothaig,
robaidhe tonn tuile tricc,
bean maic Labradha Leissbricc.

Vel [quod] est uerius .i. Aed Ruad mac Badhuirnn di Ultaib
robaided ann ic snam ind essa, conid de sin rohainmni[g]ed Ess
Ruaid.




p. 506.

[43. CNOGBA.] — Cnogba, canas rohainmni[g]ed.

Ni ansa .i. Einglic ingen Elcmaire rocar Aengus mac ind Occ
& nis-raichesstar. Do teclamsat cluichi n-ann etir Cleiteach &
Sid in Broga. Dothathaighdis aes an & sithchairedha Erenn
don cluichi sin cach aidhche samna & a cuit mesraigthe leo [.i.
cno]. Dolodar atuaid tri maic Deircc macc, Eathamain a Sid
Findabrach cor-ruccsat ingen nElccmaire hi fuadaig timchell na
maccraidi cen fiss doib. Intan rofetatar rorethsat ’na diaid co
ruicci in dind dianid ainm Cnogba. Doronsat guba moir and,
& si fess fos-railangair, a cnuassach. Unde Cnogb[a] .i. cno-guba
.i. do guba doronsat immon cnuassach ut. Unde est Cnogba.

De ata Cnogba na cuan
conid oirrdairc la cach sluag,
do guba iar mbuain cno fo gle
deis ingine Elccmaire.




p. 507.

[44. MAG MURISCE.] — Mag Muiriusca, canas rohainmniged?

Ni ansa .i. Muiriasc mór dianidh ainm Rossualt focheirdi in
muir ann fo tir & isi a ruin ind anmanna sin no aisneidhed Colum
cilli do cach .i. tri scethei dognidh, & ba si airdi cach scethi dib
.i. sceth im-muir & a ethri i n-arda .i. ba[d]udh curach & barca &
noodh, & ar for anmannu in mara isin bliadain sin. Sceith i
n-aer & a err sis [&] adcuiredh suas a sceith, ár for anmandu
foluaimnecha in aoir isin bliadain sin. Sceith ele dono fo
tir co mbrenadh in tir, ar for daine & for cethre isin bliadain
sin. Comad a n-aimsir na nAed nobeith in t-anmanna sin &
Colu[i]m cille. Unde Dallan dixit: ‘Legais runa Rosuailt etir
scolaib screptra’.

tolo muireisc moir dorala and i n-aimsir Gairb Glunraigie,
cor-rolinsat glenna & fana in tiri dono in leith fri muir.

comad hi Muiresc ingen Ugaine Mair maic Echach Buadaig
dia tucadh in mag sin, comad ann roaplad Muirisc.
Unde Mag Muirisc.

Muiri[a]sc focheird in muir mór
dia mba hainm Rosualt rigmor:
ba hangbaidh an gnim (MS fol. 15b) cen cle
rotharrngair Colum cille.

Tola mairbeisc tuile the
fri re Gairbreisc Glunraige,
fobruchta muir, milib clann,
fo ceitrib tirib Erenn.

No

Masi Muireasc chiar crechach
ingen dian, ua deg-Echach,
ba blaidh buaid cen choir cair,
fofhu[a]ir in mag co mormuir.

Muiriasc foceird in muir mór.




p. 508.

[45. DRUIM SUAMAIG.] — Druim Suamaigh, canas rohainmnniged?

Ni ansa .i. Suamach mac Samgubai senchaid & aite Cormaic
Conloingis, & Caindlech dano a buimme Cormaic .i. ingen Gaimgelta
maic Rodhba do cloind maic Tuaigh Duib maic Conaill
Congancnis in Caindlech sin.

Dia tudchaid [Cormac] aniar o Cruachain Connacht do gabail
rigi Uladh roan a haite dia eiss tiar, fodaig rofitir dofaidsad a
dalta & na bad ri Ulad eitir. Dolluidh [Suamach] aniar indegaid
a dalta dia fhosdadh arna beith tretenid for Cormac. Intan
doriacht Druim Suamaigh is and atcondairc daig na hoirgni —
intan tainic Tulaig nDer .i. dera in Dagdae mo[i]r dodosreilic
oc cainiudh a meicc .i. Cermat, is ann atconnairc daig na hoircne
— a mBruidin Da Coca, co roemid a cridi hi Suamach. Ocus




p. 509.

cuala Caindlech im-Moin Caindlich a dalta do loscud. Unde
Druim Su[a]maig & Moin Caindlich.

Suamach mac Samgubai seis,
sencaidh Cormaic Conloingeiss,
ocus Caindlech, comul ngle,
ba si sin a fri[th]buime.

[46. TUAG INBIR.] — Tuag Inbir can[as] rohainmni[g]ed?

Ni ansa .i. Tuag ingen Conaill Collamrach maic Eidirsceoil
rig Temrach. Intan dognithea Feis Temrach la Conall Collamair
doreclamte fir Erind, etir firu & mna, cucca. Dodeocaid
Fer Fiugail macc Eogabail, dalta sein Manandain maic Lir.
Rotog-saidhe Tuag ingen Cona[i]ll Collamrach dia breith less hi
Tir Ban Suthain. Rodos-fuc iarum ina collud cen airi[g]ud tri
ceird ndruidechta co hInbiur nG[l]aiss maic . . . . Dosrad sis
inn[a] suan la taeib ind inbir co ndigsed dia comairle fri Manannan,
co tanic i[n] tonn tara ess tarsi icond inbiur co ros-baidh




p. 510.

dara eissi. No comad e Manannan fesin nodos-berid, amail is
follus isind rund:

Tri tonna Erenn uile
tond Clidna, tond Rudraige,
’sa[n] tonn robaidh mnai Maic Lir
ic a[n] traigh os Tuaig Inbir.

Dolluidh Fer Fiugail fuacda,
macc Eogabail ardbruacda,
ros-fuc Tuaig, nir’bo do[d]aing dath,
ingen Conaill Collamrach.

Unde Tuag Inbir.




p. 511.

[47. CLEITTECH.] — CLEITTECH, CANAS ROHAINMNIG[E]D?

Ni ansa .i. Cleteach [macc] Dedaid maicc Sin adbath ann
sin.

Cletach Erenn .i. clethi-ach nErend, daig na haccoine
dorigensat fir [Erenn] ann sin oc cainiud Cormaic (MS fol. 15c) húi
Cuind rig Erenn.

comad cleithi tech nErind ro loisced ann for Cormac, & ni
fir son, acht is for Muirchertach mac nErcca, & ba mac mathar
sein do epscop Mel, et unde epscop Mel cecinit, et unde
Cletech nominatur
.

Fillis in ri mac nErcca
amberta dol[e]id ua Neill,
sirt fuil fernu in gach maig,
brogais a chricha hi cein.

ISam omun ol in bein,
ima luaidi ilar sin,
ar fiur loiscfidir i tein,
i taeb Cleitig, báidfis fin.




p. 512.

[48. CERNA.] — Cernna, cid dia ta?

Ni ansa .i. Cerna, dono, [mac Ailella Ólchain rohadnacht ann].

Cerna, Cermna, copbrach [cá],
Callann Mellenn, Dabilla,
Crinda, Cerrind, Coroi rot,
Cuillenn cairptech, is coem-Colt,
da coicfer sin, se[g]da main,
do sil Oilella Olchain.

[Nó Cerniam] ba hainm don sidaidhe [do thoisiuch in
tsíde] fil ann, cui nomen est Cerniam. Is uad rohainmni[g]ed in
dind sin a soin ille.




p. 513.

[49. CLOENLOCH.] — Claenloc[h], cid dia ta?

Ni ansa .i. Cloen mac Ingir Cluanae [leg. Clúade?] cetna
cennaige dodeochaid a Alpain i nErinn co nduisib flatha. Is
ann adbath icon loch ucut, & i n-oenbliadain tomaidm Loc[h]a
Dacaech & Locha da Dall & Loc[h]a Faefi & Loch n-Ing & Loch
nGabur & Loch nGaind & Loch nDuib & Loch nDremuin & Loch
nDuind & Loch Ceraim & Loch Camm, et unde Claenloch
nominatur
.

Claen macc Ingir Cluana ce,
carptech crichid cennaige,
co ndussib flath, fael ros-from,
iss ann atbath, i Cloenloch.

[50. LOCH DACAECH.] — Loch Dacaech, canass rohainmniged?

Ni ansa. Dacaech ingen Cicuil Gligargluinig, & bassi a
mat[h]air Fuata, & issed rucad [e]aturru, oen ingen dall. Atrullai
uadib assin purt, co nderg[é]nai a aidhidh isind loch ucut. Unde
Loch Dacaech nominatur. Unde poeta dixit
:

‘Dacaech ingen Cicuil Cairn
griggechgluin gran[n]a glassgairb,
ro meirb leinai, línib ler,
noco nderg[é]nai a hoidhedh.’




p. 514.

[51. SRUTHAIR MATHA.] — Sruthair Matha, cid dia da?

Ni ansa .i. Matha mac Roirenn maicc, Roga Rechtaidi rígmuccaidh
Catháir Moir immusn-erbaigset & muccaid Quind Cétcathaig
.i. Odba Uaincenn mac Blai Ballethain maicc Cathlomna
Linne. Co mbai dairi toirthech i n-iarthur Maige Macha,
& ni bai riam dairi bad torthaighe. Ceped aird [d]ia mbeth in
gaeth tairis, robad maidhm cridie do muccaib Erenn a boladh,
(MS fol. 15d) co-ndaste umpu ic saigidh in dairi. Taraill a bolad
treotu Catháir Mair. Dollotar na mucca fo boladh in daire .i.
mucca Lagen la muccaib Catháir Máir co Comur tri n-Uisci.
Roreith in muccaid fo annarbus, [co torchair,] cor-roimidh a
tulcnaim asa cind seid. Dochoidh iarum do airddibad a gaile
don sruth sin, co robaidedh ann, co nderbairt araile duine do
bruach in tsrotha: ‘Ach! in sruth dar Matha!’ Unde Sruthar
Matha nominatur. Unde poeta dixit
:

‘Matha macc Rorend co mbaig,
ba rigmuccaid co robaig,
doluidh fon sruthair snamaig,
macc Rogha co rodanaib.’




p. 515.

[52. MAG N-ITHA.] — Mag n-Itha, cid dia ta?

Ni ansa .i. Mag [n-Itha] o Ith macc Breogain romarbad ann i
cath fri ssluag siabra & fri Tuatha De Danand.

N[ó] dial-luidh Ith macc Breogain a hEspain xxx. [long] co
hIrrus Corco-duibne i nErinn dolluid iar fud Erenn fo tuaidh
[co hAilech] Neit, ait a mbatar tri ri[g] Erenn im Nectain Laimderg
rig na Fomore .i. Macc Cuill, Macc Cecht, Macc Grene. O
robatar ag tnuth & ag format fri hIth ar amaindsi, co timnais
celeabradh doib co ndolluid uaidib co Mag n-Itha & a marbad
ara febas & ara indracus. Conid dia digail dolluid Lug macc mna
Itha .xxx. long. Unde dicitur:

‘IT[H] macc Breogain, buaid ní bladh,
im-Maigh Itha romarbadh:
dofuccsat fir i cruth cacht
ar tnuth ocus ar format.’



© 2007 Thesaurus Linguae Hibernicae

Close this window