The Prose Tales in the Rennes Dindshenchas

Part I

Author: unknown

Editor: Whitley Stokes

An electronic edition


view the header | view the translation | view the printed original at the Celtic Digital Initiative (pdf format)



p. 277.

(MS fol. 90a)

SENCHAS DIND EREND INSO DORIGNE AMORGein mac Amhalgha[da]
in fili dona Déisib Temrach. Ba file séin Diairmada
mic Cearbaill. is é dorad áilges for Findtan mac Láimíach
hi Temhraigh, día mbái mordáil fer n-Erenn im righ
Temrach, im Díarmait mac Cerbaill & im Fland Febla mac
Scandláin comarba Padraicc & im sái fer n-Erenn im Cend fóeladh
mac Oilella mic Eogain mic Neill, & im Fhindtan mac
Laimhíach ardsenóir Eirend, & coro troisc Amhorghein tri láa
& teora hoidhci for Findtan hi fiadhnaise bfer n-Erend scéo
mac & ingen hi Temraigh co n-écsed do senchasa dind Erend
fódéigh rolad cach duine & cach díne dí o aimsir Cesra ingeine
Beatha — is hé cétna rogab Ere — co flaith Díarmada mic
Cerbaill, co n-eipirt inso:

[1. TEMAIR]

1. TEMAIR didiu, ol Amorgein, múr Tea ingine Luigdech,
mic Itha dia luidh co Geidhe n-Ollgothach. Is ina flaith séin
ba bind[ith]ir la cach nduine i n-Ére guth aroile bedis téda
mendcrot ar méd in sídha & na cairdine bói la cách díaroile
ind Ére. Conidh aire is sruithiu cach múr in múr sin, fobith
hit é cétnæ saorchu[i]r Érend, cuir Tea inghine Luigdech fri
Geidhe n-Ollgothach.

2. Temhair .i. Teipe múr .i. múr Teiphis ingine
Bachtir rí Espainía, is hí bai ac[C]anthon mac [C]aithmend rí
Breatan conid romarb occo si, & doradudh Heithiurún idhal na
mBretan fria taisecc go mba béo nó marb. Ruccad sidhe iarum
iarna bás co hEspain co ndernadh múr impe and .i. Teipe
múr, Atconnairc Tea didiu ben Eirimoin insin .i. múr Tephis




p. 278.

Luid-sidein co hEirind le fear & doberedh (MS f. 90b)
cach tulach toghadh in Eirinn, conid le iarum conarnecht múr
amail múr Tephis, conid inde rohadhnacht. Unde Temair dicitur.

3. Temhair & Druim Cáin & Liathdruim & Cathair Cro[fh]ind,
Druim nDéscin .u. anmanda Temrach indsin.

4. Vel ita: Temair a uerbo graeco temorio quod latine interpretatur
conspicio. Huius oppidi quod Temoriam uocamus
nomen esse deriuatum auctores affirmant; omnisque locus
conspicuus et eminens, siue in campo, siue in domo, siue in
quocumque loco sit, uocabulo quod dicitur
Temair nominari
potest. Sic in prouerbio scotico reperitur, ut dicitur
temair na
tuaithi et Temair in toighi, quam sententiam in suo Silentio
Cormaccus de hóc nomine disputando possuit. Hoc igitur
oppidum multorum sibi commune uindicat, nunc cunctis enim
Hibernensibus oppidis excellens congruenter eorum commune
uocabulum possidet, quippe cum huius rector usque [hodie]
totius insolae Scotorum monarchiam sortitur
.




p. 280.

[DINDGNAI TEMRACH INSO SÍS]

5. Nemnach .i. tipræ fil ocon tsidh ind oirrthertuaiscert
na Temrach. Glais dono teid a Nemnaigh .i. Nith a hainm.
Is fuirre ata in cétna muilend doronadh ind Ere la Ciarnait
cumhail Cormaic.

6. Lathrach tighi Mairisen fil osin tsidh fri Nemnaigh
atuaidh, & tri clocha becca [imbe]. Is amlaidh rosuidh[ig]edh
in tech sin, lar ard & túaradh airiseal. Mairiseo dono bantreabtach
bæ i comré fri Cormac. Cach tech suidigthir in tucht sin
ni ba duaibseach & ni bia cen ana and.

7. Raith Loeguire mic Neill fri sodhoin atúaidh. Cethri




p. 281.

doirrsi cach ardæ indti, & rosuidiged [corp] Læguire fo sciathgaisgiudh
frisin clodh imechtrach n-airtherdeiscertach na righratha
Loeguire hi Temraig & a aghaidh fodes ic cathugud fri
Laighniu .i. fri claind Breasail Bricc.

8. Ata hi táob ratha Loeguire anairdes lecht Níata morglondaigh
.i. amus bratbertach robai hi fail Cormaic. Robadar
lá ann cethrar ócclóech ic cluichi hi taob ratha Loeguiri anoirdes.
Foeruirim Níata a .iiii. dar cuimgib al-les hi talamh.

9. Rath ríg hi tæb ratha Læguiri atuaidh. Atát tri deccra
i suidhiu .i. lathrach tighi Cormaic ind ortherdescert na ratha
il-leith fri raith Læguiri fodes: lathrach in forraid hi tæb lathraige
tigi Cormaic anoir. Mur Tea [eturru] il-leith fodes,
conid dosam rohainmniged Temair .i. Tea múr .i. in cnoc
becc fil eter na da múr i leith buddes is and ata.

10. Caprach Cormaic .i. tipra fil fo tæb Ratha na ríg anoir;
& tri hanmand fuirre .i. Liaig & Tipra bo finde & Derc dub.
Is de ata ‘ni tæt a læg go líaigh’ [.i.] indara n-áoi a Temraig
soir & aroile a Temraig siar.

11. Duma na Bo .i. glass Temrach fri duma [na nGiall]
aníar.

12. Duma na nGiall fri lathrach in forraidh inairtuaidh.

13. Fal hi taeb Dumæ na nGiall atúaid .i. in cloch no
geissed fo chosaib cach ríg nogeibedh Hérinn. (MS f. 90c) Fal
ainm na cloichi sin .i. fo-ail .i. ail fo righ.

14. Lecht Con & Cethin isin leitir hi comardus Ratha na
ríg síar. Atat cloich and, lecht Con indara n-ói, lecht Cethin
aroile, conid gnathfocul ‘domgniis Cú & Cethen’ .i. Cú
romarb Cethen rondaire Cormaic ar lár in tighi, coro gaib
[cach]ndírghi iarsain fo dígais na Temrach síar, co narrus and,
co[nid] ro marb brathair in fir romarbsum, & atbert Cormac
na romarbtha Cú & ni tarrus ædarghaire co romarbaid simul.




p. 282.

15. Ata tobur isin comfán o Lecht Cethin fotúaidh. Loegh
a hainm: síar cach ndírgha bruindes.

16. Ata lathrach cuchtrach Cormaic for a brú isin leitir
os Læg anoir.

17. Raith na Senadh hi comhuir Dumhæ na nGiall.
Raith Senaid fri Fál atúaidh.

18. Lathrach Pupaill Adhamhnain isin raith sin, & a
chros arbeloib na ratha sin soir, & a suidhe & a duma fri
crois andes.

19. Lecht Maine meic Munremuir fri Raith na rígh anoir.

20. Ata lathrach in tighi roloisced for Benen gilla Patraicc
& for Lucad Mæl drai Læguiri, ed bec o chrois Adhomhnain
sairdes .i. hi toeb na conaire anair a bic.

21. [Ataat teora clocha beca i tæb Ratha na Senad tuaid
.i.] teora clocha roláit[h]i forsna dru[id]ib, hit é a n-anmand
i. Móel & Blocc & Bluicne. Moel soir & Blocc fodes & Bluicne
fotuaidh.

22. Ata Lecht ind Abaic friu anoir. Is amlaid ata in cubat
sairdes & síardes. Tri troigthi nama a tomus ’na escaid bicc
tis. Is amlaid ata in lighi & cloch becc fo talmain ina íarthur
& aroile ina oirther. Fogabtar tri traigidh ind indara fecht, a
tri co leith in fecht n-aile.

23. Atat dhumhæ frisin cubat atúaidh .i. Dall & Dorchæ
.i. Dall teas [leg. tiar?] & Dorchæ tiar [leg. toir] & cach
romarb aroile dib, & ni fuil múr atarru & na clocha & in cubat.

24. Múr na tri cogar i fail Luinge na mBan.

25. Lía na fían fri slighe anoir arbélaib Ratha Senaidh.

26. Ata Long na mBan .i. Tech Midhcuarta on dumhæ
oirrtherach soirtúaidh. Is amlaid rosuidhiged lathrach in tighi
sin .i. leith[red] fóa fotúaidh & a urard anes & comturgbáil
múir ime anoir & aníar. Is fillti bicc in leith túaiscert de, fotúaidh
& fodes ata [a] cóir. Fuath tighi fota co ndib doirrsib




p. 283.

déc fair a cethar déc .i. (MS f. 91a) a secht siar & a secht soir, &
isberad is annsin domeilti feis Temrach. Dethbir sin ar notallfad
forgla fer nErenn and do dóinib, & is é sin [in] tech mór
milib amus.

27. Ata dumæ [becc] fri lathrach [in taige] anairdess isin
oircend deiscertaigh .i. Dumæ na mBanamhus [a ainm].

28. Ata comfot Cælc[h]on & a arad hi comardus in cind
túaiscertaig do Luing na mban. Cælchu andsin mac Loairnd
mic Rúaidh mic Cormaic Cais di Eoganacht Caisil, is dia síl
Tuath-fis oc Temhraigh.

29. Tredumæ Neisi ingine Eachach Salbuide mathar Concobair
isin cind airtherach tuaiscertaigh hi comardus cind oirthertuaiscertaigh
Luingi na mBan.

30. Rath Concobair mic Nesa hi taeb in Tredumi atúaidh
& a dorus soir a comardus Corusa cind & meide Conculainn.

31. Ata lathrach Sceith Conculainn cona Thul hi comardus
na méidi sairtúaidh. [I]s amlaid ata raith, cutrama cosmail frisin
talmain & cnocán becc ’na medón lán na telach di úir.

32. Ata Sescand Temrach hi comardus Luinge na mBan
síartuaidh i. sescand salach becc fil hi táob Cairnn na macraidhe
andes.

33. Ata Raith Grainne o Seiscend Temrach aníar for forard
na telca.

34. Atá Fothad Ratha Grainne atúaid fo [Fhán] na Carpat
hi comardus na Clænfertæ túaiscertaighi sair.

35. Atat na di Clænfertai fri Raith Grainne aníar. Isin
Cloenfertæ descertaigh ro ort in ingenrad la Laighniu día
samhnæ. Issin Clænfertai tuaiscertaig ruc Lugaid in ngúbreith
isin glaisin do orgain dona cáirchib.

36. Ata Carnn [na] macraidhe Laighen hi tæb sescaind
Temrach atúaidh.




p. 284.

37. Atúaid atá Cros Fergusa noebailit[h]ir, is é fil hi Carraic
Cluman hi tæb Cairnn na macraidhe.

38. [Ata Dessel Temra etir in da Charn na maccraide] .i.
etir in carnn deiscertach & in carnn tuaiscertach.

39. Atá Carnn macraidhe Húa Neill hi táob Deisil na
Temrach atúaidh.

40. Raith Colman mic Faolcon o Carnn Maccraide Hua
Neill sairtúaidh .i. in carnn tuaiscertach.

41. Ata Dumhæ ind Luchduinn hi tæb Ratha Colman mic
Fælchon aniar.

42. Ata Adlaic & Diadhlac hi comhardus Ratha Colmain
sairtúaid .i. hi táob leitrech frisin raith anáir-(MS f. 91b)-túaidh
.i. di tipraid indsin, Adlaic indara n-ói & Di-adlaic aroile,
acht ni uil deochair eturra.




p. 289.

2. DUMAE N-EIRC.

Dumhæ nEirc, canus rohainmnighedh?
Ni ansae. Earc mac Cairpri Níafer mac sen Rosa Ruaidh rí
Laigen, & is é Earc robean a cenn do Coinculainn. Fedlem dono
Nochrothach ingen Concobuir mic Nesa, bean Cairpri máthair
Eirc & Aicli, como tuidchidh Conall Cernach dono do díghail
Conculainn for Erc, co torchair and Erc, [&] co tuccad a
cend co Temair fri taiselbadh, co tainic Acall a derbsíur a
hUlltaib oa fiur .i. o Glan mac Carbaid, do cháiniudh a bthar,
co mbai .ix. trath [oc] an guba, gor’ cnomuidh a cride
indti, & adbert a adnacol & a dumhæ air[m] on faicfidhe adnacul
Eirc & a dumæ. Unde Dumha Eirc & Dumha Aicle
nomina[n]tur.




p. 290.

3. RÁITH ÉSA.

Raith Easa, canas rohainmniged?
Ni ansa. Esa ingen Eachach Oireman & Étáine, dalta Midhir
Bri Leith, is lé tuccad cét cach indile co Midhir iar mbreith
Édaine o Eochaig ar aithedh a Fremaind, & ni feas cia ros-fuc
cía hairm i ruccad. Co n-epert Codhal Crin-cichech
[Crín-] cosach: ‘Ros-fucc Midhir i mBrí Leith’. Bói dano
Eochaid .ix. mbliadna hi forbais for Brí Léith & nocoilled Midhir
in toghail, & co tuc Midhir i mBrí Leith iarum tri fichti
ban co ndeilb Étaine do Eochaig, & Esa a ingen feisin etarru.
Conid annsin doreguinn-sium dib uile a ingin fesin, conid si
rucc Mes-Buachalla, máthair sein Conaire.

Luid dono Eochaid aitherrach do cuingid a mná & a érca
co Midhir, & dobert do a mnói & an eraic co n-auttaigh .i.
tochar tar Moin Lamraige & fid tar Breifne & diclochadh hi
Mide, & Luachair tar Tebtha: conid iarum dorat Echaid dia ingin




p. 291.

a rogha, cia suidiugud cosa mberta sí úadh, conid and doroegha
sin Raith n-Esa .i. airm a faicbed na tri dinna [.i.] Síd in
Broga & Duma na nGiall hi Temraig & Dun Crimthainn i
n-Étar. Unde Ráith Esa dicitur.




p. 292.

4. DINDGNAI IN BROGA.

Do dingnuib in Broga inso.
.i. Long ingine Foraind. Lecht in Daghda. Mur na Morrígna.
Lecht in Mate, is dia colptha raiter Indber Colpta. Barc
Crimthainn Nia Nair, ar is ann roadnacht. Fert Feidlimthi
Rechtmair, Carngal Cuind Cetcathaig. Com[fh]ot Cairbre Lifechair.
Fulacht Fiachaigh Sraibtine &rl.

Sencus dono in Brogha beos:

IMdaei in Daghda cetamus. Da Cích na Morrígna iarsain.
Airm i ngenair Cermaid Milbeoil mac in Daghda. Firt mBoinne
mna Nechtoin meic Núa[d]at. Is i tuc [le] in coin [mbig]
diarbo ainm Dabilla unde Cnoc Dabilla dicitur. Duma Tres[c].
Ferta Escláim brethemon in Daghda frisa n-apar Ferta Patraic
indiu. Cír & Cuirreill mna in Daghda .i. da cnoc. Ferta Áodha
Luirgnigh meic in Dagda. Derc mBua[i]lcc mbicc. Lecht
Cellaig meic Maile Coba. Lecht gabra Cinóeda meic Irgalaig.
Carcar Leith Machæ. Glend in Máta .i. seilc[h]i sin, ut alii
dicunt
. Líag Buidhe meic Muiredha, airm i fuil a cend.
Leac Ben[d] .i. lecht forsa torc[h]air in Matæ secht fichit cos
lais & secht cind. Duma na Cnám. Caisel Aongusa mic Crundmail.
Rout sula Midhir &rl.




p. 294.

5. INBER N-AILBINE.

INber n-Aillbine, canas rohainmniged?
Ni ansa. Rúad mac Rigduind meic rig Fer Muirigh tarclam
lucht .iii. noad do techt tar muir do acallaim a comaltæ [.i.]
meic ríg Lochlainne. [Feb] amluidset co leth lenna feimidset.
imram nach leth amal nos-fastad ingir. Imluid iarum Rúadh
tar luing amach ar co fesad cid dia mbói aní nos-mert &
nomsáoi fái. Atchí iarum .ix. mna cóimiu do mnáib [domain]
’ga fostad, triar fo cach nóadh. Rucsat leo Ruad dono co
fáoi .ix. n-oidhci la cach mnoi for tir tartha for longaib credumai.
Cor[o] toirrci áon díb úaidhib, & rogell afrithisi a tiachtoin
andochum ma roised a set.

Luid dono Rúad co tech a comalta & fái lais .uii. mbliadna,
& luid forcúla, & ni rofír a dáil, co toracht Magh Muirigh.
Luidset [didiu] na nói mná cusin mac & ros-fucsat léo dia [te]tarracht,
& ní mon-airnic doib. Marbaid dono a máthair a mac
fein annsin, & æn mac Rúaid, & focerd urchur [dó] dia chind,
conid and asbert cách amail bid o oengen: ‘Is ollbine, is oillbine!’
Unde dicitur Inber n-Oillbine.




p. 295.

6. OCHONN MIDI.

Ochund Midhe, canas rohainmniged?
Ni ansa. Dia ndechaid Niall Nóigiallach mac Eachach dar
muir n-Icht bói dono intansin Eochaid mac (MS f. 94a) Enna
Ceindselaig tair for tafund iar marbad Laidgeind meic Boircheda,
conid é tuc in chomairle dona mnaibh .i. cuingi[d]
deilbe ríg in domoin do taidbsin doib, coro taiselb iarum iarna




p. 296.

dietgudh doib. Bói dono Eochaid amal cach mnoi [i]na trechumasc
co cruisigh fobride fo[a]choim, conid di congegne in rí[g]
on deirc ochsaile co’roile .i. Niall, & atbert airm a clannfai[de] a
lecht co n-arleicthi a geill and & con[s]níad nert caich giallu dó.

Tucad dano corp Neill anair & mebsat secht catha riam, &
do[m]bertsat co hOchoind, coro hadhnacht and hé. Conid de
ata Ochan mor muindtiri Neill airm ir-roscar cach o aroile &
i n-arlaicit geill Erenn i suidiud. Unde Ochonn [Midi] dicitur.




p. 297.

7. MIDE.

Mide, canas roainmniged?
Ni ansa. Midhe mac Bratha meic Deatha, cétnarofhado tene
for clannaib Nemedh i nErinn, & robói bliadna for lasad,
conid on tene sin rohadnad cach primtene i nHérinn, conid de
dliges a comorba miach la muic cach oen cleithe i nEirinn,
co n-erbradar drai[d]e Hérenn: ‘Is mí-dé dun in tene-si rohadnad
isin tír’. Co ro tinolait druid Hérenn ind oentech, co tallaid
a tengt[h]a asa cennaib tria comairle Mide, corus-adnaic hi
talmain Uisneich, & co ndesid Mide primdrai & primsenchaid
Hérenn uaisib. Atbert Gairech ingen Gumoir, muime Mide:
‘Is uais nech dofilter sund innocht’. Unde Uisnech & Mide.




p. 298.

8. DRUIM NDAIRBRECH.

Druim nDairbrech, canas roainmniged?
Ni ansa. Dairbre Derg mac Lulaig meic Ligmuine do Aithechtuathaib
Hérenn, co tuairsi Ligmuine & Fer mBolg &
Fer nDomnand targlamsat cath Comuir do Tuathal. Doluid
dano Tuathal & Fiacha Casan & Findmall a brathair don cath
sin Dairb[r]i Derg, [immorro] & Eochaid Oilech forsin leith
n-aill. Fegair iarum in cath & cloithir for Eochaig n-Oilech, &
marbthair Dairbre fora drumainn. Unde Druim nDairbrech.
Vel ita: Druim nAirbre, fri Bri Ele anair ata. Unde dicitur Fothairt
Airbre .i. fothairt filet fri Bri anoir.




p. 299.

9. LAIGIN.

Laigin, canas ro ainmniged?
Ni ansa. Laigin a laginis .i. ona laignib lethnoib tucsat leo
na Dub-gaill a tirib Gall. Da cét ar dib milib a lín. moaroen re
Labraid Loingsech [.i.] Moen mac Oilella Áine, dolotar in fiallach
sin.

it laigin cumdáigti oir & airgit tucsat cerda Hérenn do
Labraid Loingsech .i. Maen, dia du[d]chaid & Ernolb mac righ
Danmarg diar’ortsat in rigraid im Cobthach Coelbreg i nDind
Rig.

is Laigin quasi laig-fine .i. fine sil Laegaire Luirc:
lurcon enim graece auidus deuorator interpretatur latine: lorc
didiu angbaid lainnfordiuclandtaid.

Tri anmann doib .i. [Fir] Domnann, Gaileoin, Laigin; &
Gaileoin roalsat Labraid for a loinges hi tirib Gall.

IT Gaileoin immorro iar n-aimsir mair batar i[c] cobraid Oilella
maic Rosa for Tain bo Cuailgne. Unde dicitur Tricha cét




p. 300.

Gaileoin & nidat Galenga, ar is cian már ría Cormac Gaileng
roferad Tain bo Cuailnge.

Docechnatar drai[d] Erenn for Galeonu co roeb[d]adar uile
inge mad bec, & an dotuaraid dib ros-dibaid Tuathal Techtmar.
Is clann Labrada immorro Laigin uile acht Lai[g]si & Fothairt
Domnann immorro ros-dilgend Tuathal.




p. 301.

10. SLIAB BLADMA.

Sliab Bladma, cid diata?
Ni ansa. Bladma Blod mac Con, meic Cais Clothmin,
micc Uachaill, romarb Bregmæl gabaind Cuirce meic Snithe
rig Erota. Doluid iartain ina noedin co rogaib a feronn a
sliab. Unde Sliab Bladma.

is Blad mac Breogain ba marb ann do tám, et a quo
mons nominatur
. it bleda mara .i. biasta mara, ruiseda a
n-anmann, & bit i n-uiscib & i tirmaib, & it he foruidbet na
cranna (MS f. 95a). Unde ‘Sliab bledach Bledma’; & Ros
Náir meic E[d]licon he prius.

11. FID N-GAIBLE.

Fid nGaible, canas ro ainmniged?
Ni ansa. Gaible mac Etadoin meic Nuadat Airgetlam tall




p. 302.

grinne Ainge ingine in Dagda roteclann si do denam drochta
di, ar an drochta fognid in Dagda ni anad do tinnsaidsin cen
nobíd muir for tuile, & ni tucta banna as cen ba aithbi and.
Tarrlaicc ercor don grinne sin a Belach Fualasccach co ro fas
Finncoill as, conid de ata Fid nGaillbe nGaible nunc.

comad Gabal ainm na haband dotáot trit. Unde dixit
Bercan:

IS inmain in gabalsa
bid uaithi ainmnegad
for leth in fiadaso,
a rad ni ro.
in gemsa carrmocaill
in ucht na cluanaso
tall sluagh, mor fo.

comad hi Gabal Gairechtain ingen Guill, ben Óirc meic
Ingoir ri Atha cliath nobaidte isin abaind sin iar marbad a fir
la Ailill mac Æda Roin i n-Ath Orc. Unde dicitur Fid
nGaible & Gabal & At[h] Orc.




p. 303.

12. MAG LIFI.

Mag Life, canas ro ainmniged?
Ni ansa. Life ingen Cannain Cruthnig doluid la Deltbanda
mac Druchta, dailemoin Conaire Moir rig Temra. A Síd
Buidb ar Femen do. Fodes didiu o Temraig gabsat, ar rop
aloind lee in mag darsa tanic co ndatig a hainm fair. [Conna
ro dáil Deltbanna do fheraib Herenn coro ainmnigthe in mag
út o anmum a mná.] Unde Mag Lifi.

Nó co mbad Fea an ainm & li oni ba laind le ina faca.




p. 304.

13. BERBA.

Berba, canas ro ainmniged?
Ni ansa. Meiche mac na Morrigna is and robatar na tri crideda,
corot-marb Mac cecht im-Maig Mechi. Mag Fertaigi
dano a ainm in maige co sin. Amlaidh badar na cride sin, co
ndelbaib tri nathrach treithib. Meni torsed dano bas do Mechi
arforbertais na nathracha ind & focnafed ana faigbet béo i nHérinn.
Roloisc iarum Mac cecht in[na] cride sin im-Maig Luathat,
coro la al-luaith lasin sruth, conid romarb eas in tsrotha,
[&] coro marb cach n-anmanda roboi ann, & coro m[b]erb.
combad i n-Aird Luaithrid [noloisc]. Unde Berba dicitur &
Mag Meche & Aird Luaithrid.

coma[d] Berba .i. ber nó bir & ba .i. balb. Unde Berba
dicitur .i. usce balb.




p. 305.

14. MÓIN GAI GLAISS.

Moin Gai Glais, canas roainmniged?
Ni ansa. [Gae] Glas mac Luinde meic Loga Liamna, nia sin
Fiachach Srabtine. As do dorigne an goba in gæi dot[h]ecuisc.
Doluid [andeass] Culdub mac Dein dia samna do cuingid
gona duine ecin, co roguin Fidrad mac Dama Duibe, a quo
Ard Fidraid. Dochuaid Gæ Glas ina iarmoracht, co tarlaic fair
in sleg dogena in goba do tri drai[d]echt, co ndechaid tria
Culdub isin monaid, & ni frith in[t]sleg sin iarum, acht oen
tuarascbail fosfuair Mæl Odarn mac Dimai Croin dia ngegna
di Ait[h]ecda ri Hua Mail iar mbeith Mæl odrain bliadain
hi talmain, diar’ cachain som in rand so:

IMlech Ech
i Moin da Ruad ar cach leth,
ci[a] ron-maid enech ron-bi
nirbo dui, a Aithechdai.

Ba si sin in Carr Belaig Duirgein, is i nomarbad [in] trichait
mbuiden. Amlaid nobid, & gobal fo bragaid, & nis-luaidhed
nech acht demon. Hi cein bess in sleg & a rind fodess ni forbrisfidir
nert Leithe Cuind o Laignib.




p. 306.

15. FAFAIND.

Fafaind canas ro ainmniged?
Ni ansa. Broccaid mac Bruic do Gailianaib Labradha
Loingsig, is do ba mac Faifne file & Aige a ingen. A máthair
Liber ingen Luit. Badar foirmdig dáini doib. Fodailsed siabra
andochum co rodelbsad Aigi in læg n-allaid cor’ cuir cuaird fo
cethair timcoll Erenn, co ros-marbsat fian Meilge mac Cobthaig
ri Hérenn, & ni frith di acht bolg usci, & mos-laisen isan
abaind, conid uaide ainmnigthir Aigi.




p. 307.

Luid iarum Faifne a bráthair do ainmed rig Hérenn
ina digail, coro tuarcbadh tri bolcca fair. Rohirgabad
iarum in file la Melgi ar ba dicinaid i n-oided Aici, &
romarbad he i Fafaind ison aire rig Temra, & inde roadnacht,
& conaittecht ina marbtai, mo ainm do bith i nduma sin dogrés
.i. Duma Faifne.

Luid Liber dia cumaidh corus-baidh isin Liber, conid uaide
arsegar. Rotamlaig Broccaid ir-Raith meic Bruic.




p. 308.

16. ADARCA HUA FAILGI.

Adarca Hua Failge, canas ro ainmniged?
Ni ansa .i. Iuchna Echbel qui et Iuchna Ciabanach rigbriugaid
bæ fri Fafaind atuaid anair i Fán in Briugad .i. Machad
Bri[g]de. Ba he a besad, altrom & imtoccbail sotha a
tighe co mba bliadain, coro carsat (MS f. 96a) a cethre hé. Intan
[immorro] ba marb he documlaiset a cethri adochum con fasad
tri la & teura haidche ’mo cholaind. Amal na tuitcid leo musluid
cach dib i tuaim in aroile, & fodailet Iuchna co a
n-adarcaib, & focerdad an gléo cor’ lasat a n-adarca co mbatar
dumæ dib isna tabcaib (?), conid dib dobertar Adharca. Mosluadat
iarum do díl a n-itad co Boinn, & fos-dailed co Almain,
comdar mairb ina n-almaib inti, et unde dicitur Almu.

Almu didiu ingen Bécain briugad, ben Iuchna [Ciabaig. Im-sai
iar mbas Iuchna] ind diaidh a halaim co maigin a hathar,
co n-apad n-and do chumaid Iuchna & do dith a ceithre, et a
qua
Almo dicitur.

Vel ita. Almu Almóin .i. fri moin aniar ata, ut dicitur Airbri
fri Bri Eile anoir.

Vel Almu .i. ail mo, id est .i. ail os moin, i moin, all
mou, ollmou.




p. 309.

17. AILLEND.

Aillend, canas ro ainmniged?
Ni ansa. Crem Marda rucc ingin Luigdech rí[g] Laigen ar aithiud.
Aillenn didiu a hainm. Aillbe a hainm a hoirce, & ad-bath
Aillenn ar naire oice, & asna aball trena lighe — is [di] asberar




p. 310.

Aball Aillinne, & atbath a hoirce ina diaidh sidhe, &
rofás ibar tritside. Is de asberar Ibur Baile .i. Ailbe tre delidín,
ut dicitur

Aball Aillinde arda     Ibar Baile, bec forba,
cia asberar a láide     nis-tucait dáoine borba.

Art Mes-delmand mac Sétna cedna conacclaid múr n-Aillinne.
Fiach didiu & Buirech & Ururus rosclædar fadéoid. Buirech
dono focerd asin clud in cloich fil indti, dia n-ebairt ‘Ail
and’, & ised ainm nos-bía. It imda didiu a hanmand iarum, ut
alius dixit
:

Aillend aenach diar n-ócaib, etc.




p. 311.

18. CARMAN.

Carman, canas ro ainmniged?
Ni ansa. Triar fear tancadar a hAthin, & oenben léo .i. tri
meic Dibaid meic Doirci meic Áincís íad .i. Dían & Dub & Dothur
a n-anmand, & Carmean ainm a máthar.

Tria brichtu & dicetla & cantana nolúited in mathair cach
maigin: tria fogail & esindrucus, immorro, romilldis na fir.

Dolodar dono co Herinn ar ulc re Tuaith dé Danann, do coll
etha na hindsisea forro. Olcc iarum la Tuatha dé Danann
indsin. Doluid Ái mac Olloman o filedaib, & Cridenbel o cáintib,
& Lugh Læbach o drai[d]ib, & Be cuille ona bantuathaib do
cetol forrosum, & ni ro scarsat friu cur’ cuirset in triar fer tar
muir, & fac[ab]sat a ngiall afus .i. Cairmen a mathair, arna
tisdais co Hérinn afrithisi, & tucsat dia cind in sechta nos-fognad
na ticfaidis airet beith muir im Hérinn.

Ba marb afus a máthair sin do cumaid ina giallacht, & rocuindig
for Tuaith de Danann airm i n-adnaicfidea co n-agtais
a hænach and, & co mbad hé a hainm nobeith an ænach sin &
in maigin semper. Unde (MS f. 96c) Carmuin & aoenach Carmuin,
& fogniset Tuatha dé Danann hindsin aireat badar i
nHérinn.

Vel ita. Sen-gairmun tainic indegaid secht n-erca nEchach
[Bélbuide] tuc Lena mac Mes-reoda & Ucha ingen Oxa Rigcerta
a máthair in meic sin, & ba ben sen Mesgeagra meic Dato rig
Laigen iarum. Batar dono maráon la Lena ic sethad in buair
sin hic Sen mac Duirb & Lochar Luath mac Smiraig & Gunnait
mac Sucait & Altach mac Duilb & Mothur mac Largaig.




p. 312.

Fos-fuair Sengarman ic Raith Bic fri Dún maic Datho an[d]es.
Marbthar Ucha iarum cona bandtrocht & in milid tucsat in
mbuar, & tuc Sengarman leis a búar co Mag Mesca ingine
Buidb iarna breith dosum a Sidh Findchada i Sleib Monaid i
n-Albain, co n-a[t]bath Mesca ar naire isin magin sin, & foclas
a fert and .i. fert Mesca ingine Buidb, & ruccsat .iiii. meic in
Dátó .i. Mes seda & Mes roeda & Mes deda & Mes delmon, for
Sengarmun isin maigin sin, & docer Sengarman and, & foclass
a fert and, & conaitecht ænach nguba do gnim and, & co mbeit[h]
a ainm in aenach sin & in maigin sin dogres, et unde Carmun
& Sen-carmun dicuntur, & fognidis Laigin insin ar trebaib
& ar tellaigib co Cathair Mor. Ni farlaic Cathair immorro
acht [d]o tellaigib fodesin & remtus la sil Rosa Failge, a forgabail
& an deoraid i lurg in aenaig, ut sunt Laigsi & Fothairt.

Secht ngraifne and & sechtmain fri agad bretha & cocerta a
cuigid fri bliadain.

Is and fognídís Laigin Desgabur in laithi déidenach de. Is
de adberar echtres Osraige. Forud [a rig for deis ri(g) Carmun:
forud] [rig] Hua Failge fora clíu, & is amlaid a mna.

Hi kallaind auguist notéigdis ind, & hi sexid auguist noticdis
as, & cach tres bliadain fognídis, & da bliadain fria tairecc.

[.Lxxx. & .d.] bliadan o rognid in cetna aenach and cusan
dara bliadain cethorchat flatha Ochtauin Augusti ir-rogeinir
Crist.

Ith & blicht doib ara denom, & cen forran coigid in Hérinn
foraib, & fir riglaig leo [& mna metha] & suba la cach saintreb,
& cach meas mar taidbsin, lína lana o uscib, & meth &
mochléithe [ocus] rig occa doib mene denad insin.




p. 315.

19. BOAND.

Bóand cid diata?
Ni ansa. Boand ben Nechtain meic Labrada dodechaid docum
in tobair diam[air] bui i n-urlaind in Sídha Nechtain.
Cach óen fodriced ni ticed uad can maidsin a da rosc acht min[i]ptis
hé Nechtan & a tri déogbaire .i. Flesc & Lam & Luam a
n-anmand.

Fecht and musluid Boand la dimus do cobfis cumachta in tobair,
& asbert nad búi cumachta diamair connised cumac a
delba & imsói tuaithbel in tobuir fothri, & máidhid tri tonna
tairsi don tobur, & fosruidbed a sliasait & a [leth]laim & a lethsuil.
Imsói didiu for teched a haithisi co fairgi & an uisce
anadíaidh co hInber mBóinne, & ba hísin máthair Oengusa
meic in Dagda.

Vel ita: Bó ainm in [t]srotha & Find aband Slébe Guaire, &
dia comrac mole is ainm Boand (rectiusfhind).

Dabilla ainm a hoirce, unde Cnoc Dabilla, Sliab in Cotaig
hodie.




p. 316.

20. NÁS.

Nas, cid diata?
Ni ansa. Eochaid Garb mac Duach rí Hérenn is é ro escair
for firu Hérenn tictu fri selgad Caille Cuan co laignib & bacaib
& belaib leo ar anóir a mna .i. Tailtine ingine Magmoir.
Slechtsat dono Caild Cuan fri mis, conid e in mag sin Ænach
Tailten. IMfocht i mbái nech do feraib Hérenn fria hobair immuig.
Frisrogart Bri Brúglas, echlach Tailltine: ‘Failet tri
rathmuige Hérenn .i. Nas & Ronc & Ailestar, tri meic Dorcland.’
‘Marbtar ind,’ ar Taillti. ‘Ni hamlaid’, ar Eochaid,
‘is ferr a mbeathu indás a mbas; acht denat rath (MS f. 97c)
muighecht béos’ ‘Bid amlaid’, ol Taillti: ‘claidet tri
ratha damsa.’

Is and conclaid Nas a raith, & is é a ainm dusfil .i. Nás, &
raith [for]foirb nGaind meic Dela .i. cóiced Concubuir indiu.

Claidis dono Runc a raith .i. Ráith Ruinc la Dal Araide. is




p. 317.

edh a ainm dusfil, .i. [leg. &] raith for foirb nGenaind meic
Dela .i. cóiced Oilella meic Mata indiu.

Is ann con[a]clai[d] Alestar a raith for Sleib Collan .i. Sliab
Leitrech indiu: is de asberar raith Cluana Alestair. .i. raith
[for] foirb Sengaind meic Dela — .i. cóiced Coi[r]pri aníú.

Unde Ráith Ruinc & Nas & Ráith Alestair.

Vel aliter: Nas & Bói da ingin Ruadri meic Taite ri Bretan,
.ii. mnói Loga meic Scail Bailb. Nás dano máthair Ibic
meic Logha. Is and adbath Nás, & roadnacht i Nás, conid de
asberar Nás. Marb iarum a siur focétoir .i. Bói, dia cumaid,
corus-adnacht i Cnucc Bæ, et unde Cnuc Bái dicitur .i. Cnoc
Bua. Targlaim Lug slogu Gaidel leis o Tailltin co fiad in
Broga do cained na mban sin im kalaind auguist cacha bliadna,
conid de bai nasad Loga. unde Lugnasad .i. comarc Loga
cuimniugud nó aithmed feil bais.




p. 318.

21. CEILBE.

Ceilbe, canas ro ainmniged?
Ni ansa. Find File mac Rosa Ruaid dochuaid do tig Bea
(MS f. 97d) Gelcnis ingine Coirpri Niafer. Boi didiu coirmfleid
ar cind a hathar & ni[s]tarfaid do brathair a athar, ciarba filid
& ri ind oenfer, & ni frith dó acht as & arbur, conid and asbert
Find Filid:

Nit-raib brig do buanseilbe,
a Be bailc gan brathirsi,




p. 319.

aithbi oll a[r] [t]h’airmitne.
ni turcbatar sáorflatha
arbeloib do brondfine
saoghal sund a sentaine
acht rat[h]aib [nit-raib].

Rogab iarum att in ingen comba lan & rodún a comlaid
conustacht a hanail, co n-apad de, & rohadnacht i[si]n airm
[sin], con-aprad a claide: ‘sunda fo ceil Be and’. Unde dicitur
Celbe.

Aliter: Cairpre mac Rosa, Cairpre Colbi air & Niafer. is é
roadnacht sáorgiall Temrach beo and, conid[d]e asberar Colbeo
Ceilbeo, & unde Celbe.

Vel ita: Dallan mac Machacan meic Echtigirn, sui Hérenn
ind eicsi & i filidecht. Doluid do tig Gelbe ingine Cerbaill meic
Muirecain rí Laigen. Is é rotoimsedh each ndicelta. Luid in
ingen do failti fris & craeb droighen cona hairnib fo coim, &
asbert: ‘Cid fil fom coim, a Dalláin?’

Dixit Dallan:

Focuirim firt faitsine
la faedh fesa findecsi
armbad fochraib faillsiges
faitsine bas tui.
donndos droigin delgtigi
fo dubarnib diballa
fail fot coim, a caomingen,
not-cuireb fo cúi.

Contuaisi Gelbe la sodhain & asbert in fili: ‘doriarut ar
dogensa t’ainmed’. ‘Ni tó’, ol an ingen, ‘bid lat in maigen




p. 320.

conrancamair, acht m’ainmsi fuirre .i. raith Gelbe’ & unde
Ceilbe.




p. 321.

22. LIAMUIN.

Liamoin, cid diata?
Ni ansa. Liamoin Lendcáin & Forcartoin & Mianach Truistiu,
cethri hingena Dubtaig Dubtaire meic Forgnæ rí Deisi
Breg co ros-carsat cethri meic Áic[h]ir Cirr meic Echach Ondat
do Ernaib Mumon, do sil Mogha-lama, meic Luigdech meic
Coirpri Cromcinn, co tancatar ceithri meic Áichir aníar co
tech nDubthaig .i. Fordub, Fornocht, Roimper & Fomu a n-anmann,
co ro lasat a curu bliadain fri Dubthach. Batar ic cuingid
a n-othar iarsain, & ni tuc Dubthach co mbidis mís fri
bliadain oca, ar is ed [Dubthach] rotuill mís fri faichill & combuitecht
mbliadne. Doluid Dubthach for creich i Laignib. Leicid-sium
galur forro, arna tisdais leis. Dotáot Dubthach iarum
& elaid-sium da eis & cethri hingena Dubthaig leo, co comarnaic
Dubthach friu i Laignib, corus-marb a n-ochtar .i. Fomu
fer Liamna, Roimper fer Forcartana, Fornocht fer Mianca,
Fer-dub la Truistiun. Romarbaid didiu uile .i. Ferdub ic Dubathaib
Masten, Fornocht ic Fornocht, Roimper i-nGlais Rompair,
Foma a Foma, Liamain for Liamo, in Mianach i n-Acuil,
Forcartain i Forcartain, Truistiu for Ath [Truistenn].

Doluid dono aniar a máthair .i. Luachair Bairennach a hainm,
& a Boirind Corcumruad di, co fuair fis bunaid marbta a ceithri
mac, co romaid a cridhe indti. Is di asberar Luachair Bairendach

Doluid Aic[h]er co n-apad hi Cnuc Duma Aichir ind Uib
Felmeda. Conid dia derbad sin rocachoin in filid (MS f. 98a)
Dingnai Laigen, lith ngaile, &rl.




p. 323.

23. DÚN NGABAIL.

Dun nGabail, canas ro ainmniged?
Ni ansa. Gabal ingen Guirt [Glais meic Fedlimid, co tainic
Lutair] mac Luirgnigh dia cuingid, co rofái leis. Amlaid boi
didiu Lut[air], & secht cind déc fair. Airdiu cach ralaig [é],
cæca cubat ’na gabul, & a leth na leithe. Fer ele didiu coa
cuingid, Fuiter mac Forduib a ainm, co tainic sein anair, &
Labraid Laimderg leis, & Brodar mac meic Sciach & Ibar mac
Sciach & (MS f. 98c) Glas mac Sgairb, co[r’] gabatar tech fuirre,
& rogab Gablach Fuiter ar gail, co torchair le; & ni terno nech
dona tainic anoir do cosnum ingine Guill. Unde Dún nGabail
nominatur.

24. BELACH NDUIRGEIN.

Belach nDuirgein, canas roainmniged?




p. 324.

Ni ansa. Duirgein ingen Luaith meic Lomgluinigh meic
Lomaltaig meic Lathraig do sil Mercill meic Smirduib & Ercad
ingen Tresca siúr sidhe Léige ingine Treasca. No fæd dono
Ercad la mugaidh tarcend Luaith, conus-fuair Dúirgin, & atféta
sén dia hathair amail conairnecht in gnim. Luid iarum Ercad
i mbáigh Indigh meic De[ad] Domnann, ar [ba] brathair
di se, co comtisadh le do digail a sceoil for Duirgin. Luid didiu
Indech le co Belach da mBend, ar ba hé a cétna hainm, & for-forbairt
Indech a bandail, & ni forfaem Dúirgin dó, & conoga[i]b
a armu & imsói fri hIndech, & imsói-sium friae se, & oirgis
Indech in mnai di sodhoin, & ferais Duirgein .l. crecht fair-sium.

Hi cuiced bliadain dec flaithiusa Nuadat Airgetlam is and
dono nobith ic slait & ic sírorguin forsin mbelach út, conidh dia
bás & dia bethaidh rohainmniged in Belach.




p. 325.

25. BAIREND CERMAIN.

Bairend Cerman canas roainmniged?
Ni ansa. Cerman Caladcend mac hUargusa meic Doltaigh
& Digais Dibartach ingen Etarbaidh a bean, secht meic & cóic
ingena leo. Casan & Fuilech & Fledhach & Liath & Dimoin &
Scal [&] Dornmár anmand na secht mac sin. Capach & Mala &
Bresa & Bairend & [C]liath na cóic ingena indsin. Dlomais
[Digais] doib & asbert Cerman friu ara ng[n]itis (MS f. 99a) fri
heri mías, & fodailset iarum cach ina conair úadib .i. Casan co
Glend [Cuill], Fulach co Glend Smoil, Fledhach co Der[g]moin,
Liath co Glend Findleit[h], Dimain co Carraic [n]Drobeoil,
Scail co Scairb Indech, in Chappach co Glenn Cappaige,
Mala for Malain, Bersa ina Muig. Bairend [aroen] re athair i
Coilliu Cermain & ic Babluan .i. nomen amnis frisn-abar Bairenn,
Cliath ig Bernai na Cleithi, Digais a máthair for Sléib
Digasa.




p. 326.

26. DUIBLIND.

Duiblind, canas roainmniged?
Ni ansa. Dub ingen Roduib meic Cais meic Glais Gamna
ben [Enna] meic Nois meic síde a Forcartain, ben ele do [Enna
.i.] Áidhe ingin Oichinn meic Cnucha, co ro étaigh Dub
fria [in uair rofhitir, uair ba drai & ba banfile isi Dub,] co tu[d]caid
la taob in mara co comor treibe Ocind. Dochachain
bricht mara, coro baithedh isin treib sin co lín a fualais, corus-rathaig
Mairgine gilla Ocinde, & imsói fría, & foceird cær clis
asa tabaill ’na dochum, co rus-tascuir (MS f. 99b) dia conoir &
corus-bruidh, & co torchair isin lindigh. Unde Duiblind dicitur.




p. 327.

27. FORNOCHT.

Aliter Fornocht .i. Uince Ochurbel, & is de asberar Ochurbel
fo bith aroile fer bo achurbeoil ic labraid dia sun, daig ni
labrad Uinci acht tri lai & tri haidche ria samain & iar samoin
cacha bliadne, & adfed dia muindtir lergnima na bliadne beus
amail cach faith. Fer ar fichit a lín dogs.

Doluid didiu Uinci o cath Atha Chind mara rofecht la Finn,
co tuidchid co Dun Droma Dean .i. druim etir dó en .i. usce
fris dia anoir & día aníar, conid desin asrubrad Druim nDen
de prius, et dono ba fidbad tunc. Ecmaic Uinchi inadochum
in duine sin & rorand a trib sechtaib .i. trian for tamnad fedha
& in trian ele fri machtadh ndæne & in tres trian fri loscud in
duine & in denmusa olchena, cona farcobsat formáol fornocht
fon samla sin.

Amsói aniar Find iar mbliadain co faca a dun fornocht, cen
díaidh, cen tech, cen tenidh, & sé ferach fornocht, & imsoat andíaidh
Uinchi co hAth ind Uinci .i. Find & Oísíne & Cailti,
& dofuit Uinchi léo .i. morseser la cach fer & Uinci la hOisine
& la Cailti, ar dofubad Find cohanbal isin aurgail sin.
Conid desin asberar Ath ind Uince & Fornocht.




p. 328.

28. ÁTH CLIATH CUALANN.

Ath Cliath, canas ro ainmniged?
Ni ansa .i. cliatha caolaig doriginset Laigin hi flaith Misgegra
fo cosaib caorach Aitherne Ailgesaigh ’ca n-adnacal
co Dún n-Étair airm i ragbad allaind Étair for occaib Ulad, du




p. 329.

docear Mes-dedad mac Amargin do laim Mes-gegra ri Laighen.
Conid dona cliathaib sin rohainmniged Ath Cliath.

Vel ita: Ath cliath .i. dia robruiset fir Erenn baill in
Matæ roslas i mBrug Meic in Óic for Lig Bend, co ro lasat
iar mballaib i mBoind co riacht a colpta co hIndber Colptha
et unde Indber Colptha dicitur, & comlaid cliath a comblaid
iar muir lam fri Heirinn, co ro toracht cosin ath ucat. Unde
Ath Cliath dicitur.




p. 330.

29. BENN ÉTAIR.

Bend Édair, canas roainmniged?
Ni ansa. Etar ben Gaind meic Deladha, an coicedh ri Fer
mBolg, is í sin an cétna ben atbath do cumaid a fir sund prius
& is and roadnacht, i mBeinn Étair.

Aliter Etar .i. o Étur mac Etgaith robói a clemnus Manandain,
is é atbath do seirc Aine, co n-acladh a fert isin beind
ucat.

Dún mBrea dano & Druim Ing & Áei Cualand & Sliab Lecgach,
canas roainmnigthe?

Ni ansa. Dia tudchaidh Partalon tuc leis Brea mac Senbotha,
an cétna fer lasa ndernadh tech & coire & comrac óeinfir
artus a n-Eirinn, & is é congab Dun mBrea & in inber ucat, &
is and rohadnacht.

Óe Cualand immorro: cath dobert Cuala & Ing mac Doirb
Glais do Crimthann Sciathbel .i. do rig Laigen, co ro marbad
Cuala and, & coro fuirmed a cend forsin sliab, & in cloch forsar’
fuirmed in cend sin is í in Óe Cualann sin, & dorochair
Ing for Drumaind. Unde dicitur [Druim] Ing.

Lecga immorro, dia tu[d]cadar tri meic Conmind meic Conmaic,
tri hui [Duind] Désa, oidhci samna, do tigh Deirg do
gabail Bruidne da Derga for Conaire comus-torachtadar hi sléib
lecca, co n-ebeart Lomna Druth friu, cloch cach fir do fuirmedh
isin tsléib, ar co fesdais a lín ac dul, & co fesdais a tesbuide
ic tuidecht on togail sin, & facbait cloch cach mairb ann.

Unde Bend Étair & Dún Brea & Druim Ing, Óe Cualann &
Sliab Leccach nominantur.




p. 332.

30. DÚN CRIMTHAINN.

Dún Crimthainn, canas ro ainmniged?
Ni ansa. Dun conrótacht la Crimt[h]an mac Luig[d]ech i
mBend Etair, qui et Nia [.i.] fer Naire dicebatur: tredecim annos
regnavit
.

IS é docuaid i n-echtra a Dun Cremt[h]ainn a Dail Uisnigh,
ut ipse dixit, la Nair tuaidhigh in bansidhe, coma fæ
caictighis ar mís [and], dia tubairt na seotu imdai, imon carpat
n-oir & imon fi[d]chill n-óir & imon cétaigh Crimthainn
.i. lend sainemail, & aroile séotu imda olchena; & atbath iarsain
ahaithle a echtra im-maig Étair, & roadnacht ina dún.




p. 333.

31. RÁITH CNÁMROSSA.

Rath Cnamrossa, canas roainmniged?
Ni ansa. Mac cecht mac Sloide Seiched do Connachtaib roalt
Lee Fer Flatha mac Conaire. Is é rotesairg a[c] togail Bruidne
da Derga cona forruim i cobraid a sceith in mac, & rombrui
& rom-baid turtur & treinimteacht in miledh (MS f. 100d)
& tæscad & tesbach a fola, corondecca hi Corraib Ednecha, &
ni fuair acht carnail cnam comai[g]de & topachta a cobraid dia
scieth, & fosceird in cnamfros sin inde, & ros-adnacht iarsodoin,
et [unde] Cnamros dicitur.

Aliter Cnamros. Mær ben Bersa a Berramain dorad seirc do
Find mac Cumaill, co ro delb nái cna Segsa co n-ept[h]ib
seirce indib, & focart hIbuirni mac Deduis dia n-adnacol do
Find, & asbert fris a teinm & a tomoilt. ‘Ni tó’, ol Find,
‘ar nidat cna rois, acht is cna amrois, & ni fes cid dia filet
acht dolba[d] fri hol serci annso’, & ros-adnacht Find traig i
talmain, et unde Cnamros dicitur.

Vel ita: Cath Cnam[rosai] rocloi Bresal Belach for Cairpre
Lifechair cona claind & for Fiachaig Sraibtine [&] for Eochaig
Doimlen nonbur & .dcccc. & .ix. mile a n-esbaid & tucaid a
frossa cnam issin rathaid ut. Unde [Ráith Cnámrossa].




p. 334.

32. MAISTIU.

Maistiu, canas roainmniged?
Ni ansa. Maistiu id est mes-du, du baile i mbidh mes, ut dicitur

Ba fidbaid aimser robói, &rl.




p. 335.

Aliter: Maistiu ingen Oengusa meic Umoir dos-fuc Daire
Derg mac Eachach Táobfota a crich Comal, a háonach Óengusa
co comfarnaic fria Gris banlicerd ingin Ricisi for lar in
muigi [Maisten] conagaib ailges di & rusn-esert co nglamaib aimnechaib
co n-apaid reim[p]e de. Roléic Daire a urchur [for
Gris] do nertlic miled bói leis, cc ndeirgeine bruar dia chind
for lar in maighi, co n[d]eillig i Sruthar Snuaidhe, conid Gris
ósin alle.

Vel ita: Maistiu ingen Oengusa meic Umoir, bandruinech
Oengusa in Meic Óicc. Is í rochum delb crossi prius i nErinn
hi corthair brollaig inair Oengusa, ar ros-tadban Oengus di
isin maighin [sin]. Unde Mag Maisten dicitur. Emon dono
Conold mac Oengusa & Máor, a qua Ath Maire & Ath Mara
hodie, & atbath Máor & Maistiu do cumaid Conoild Cáoil meic
Oengusa. Unde Maistiu & Ath Mara.

continue to part II



© 2008 Thesaurus Linguae Hibernicae

Close this window