Cúrsaí Iarchéime

Cúrsaí Iarchéime

Cuirimid na cúrsaí iarchéime seo a leanas ar fáil mar Scoil ildisciplíneach:

MA Scríobh & Cumarsáid na Gaeilge

(Dioplóma Iarchéime ar fáil mar rogha eile)

Tá an clár MA seo dírithe ar scoláirí a bhfuil cúlra acadúil acu sa Nua-Ghaeilge nó in ábhar gaolmhar, agus ar ghairmithe Gaeilge agus Meán. Is é an aidhm atá againn ná an Ghaeilge is an litríocht is an cultúr a ghabhann léi a chaomhnú agus a chur chun cinn, agus béim a chur ar an tábhacht a bhaineann leis sin ó thaobh shochaí na hÉireann de, go mór mór i gcomhthéacs an Ghaeilge a bheith ina teanga oibre san Aontas Eorapach agus i gcomhthéacs Acht na dTeangacha Oifigiúla. Cuid lárnach den chlár is ea an bhéim a chuirtear ar thaighde comhaimseartha agus ar ardscileanna teanga, gairmiúla i réimsí mar an t-aistriúchán, an t-aistriúchán dlí, na meáin, an eagarthóireacht agus scileanna scríofa.

MA sa Nua-Ghaeilge

(Dioplóma Iarchéime ar fáil mar rogha eile)

Tá an clár MA dírithe ar chéimithe Nua-Ghaeilge agus céimithe disciplíní gaolmhara. Is í an aidhm atá againn ná an Ghaeilge agus an litríocht agus an cultúr a ghabhann léi a chaomhnú agus a chur chun cinn, agus béim a chur ar an tábhacht a bhaineann leis an méid sin ó thaobh na hÉireann agus na hEorpa de. Forbróidh scoláirí ardscileanna teanga sa Ghaeilge agus cuirfidh siad lena n-eolas ar litríocht, ar chultúr agus ar stair na Gaeilge.

MA sa Léann Éireannach

Is clár idirdhisciplíneach é an MA sa Léann Éireannach atá dírithe ar chéimithe a rinne staidéar ar an stair, an tsochaí, teangacha, an litríocht agus ar chleachtais chultúrtha. Tá an clár dírithe ar scoláirí náisiúnta agus idirnáisiúnta a bhfuil suim acu i bhfréamhacha na litríochta agus sa litríocht chomhaimseartha, sna meáin, i scannáin, sa traidisiún coiteann, in oidhreacht agus i sochaí na hÉireann i gcomhthéacs domhanda. Is é is aidhm leis an gclár seo ná cur le tuiscint an duine ar an litríocht, an fhéiniúlacht agus na struchtúir sa tsochaí a chuireann béim ar thábhacht agus ar ról mhuintir na hÉireann agus shochaí na hÉireann i gcomhthéacs náisiúnta agus domhanda.

Ard-Dioplóma i mBéaloideas na hÉireann

Cúrsa múinte a mhaireann bliain is ea an tArd-Dioplóma i mBéaloideas na hÉireann. Is féidir le scoláirí MLitt agus PhD a dhéanamh sa Bhéaloideas ar leibhéal iarchéime chomh maith.

Is le haghaidh daoine nach bhfuil aon staidéar déanta acu ar an mbéaloideas ná ar an eitneolaíocht chomparáideach cheana atá an tArd-Dioplóma i mBéaloideas na hÉireann ann go príomha. Cuirfear ar a gcumas eolas a chur ar na gnéithe is tábhachtaí de na hábhair sin. Lena chois sin, beidh na scileanna, an t-eolas agus an taithí acu atá riachtanach chun a dtionscadail taighde i réimse an bhéaloidis a leagan amach agus a thabhairt chun críche.

PhD / MLitt

Tá traidisiún láidir taighde agus scoláireachta sa Scoil sna hábhair seo a leanas: an Nua-Ghaeilge, an Léann Ceilteach, an Béaloideas agus an Eitneolaíocht agus an Léann Éireannach. 

Má tá tú ag cuimhneamh ar thabhairt faoin taighde linn, molaimid daoibh súil a chaitheamh ar na réimsí taighde atá againn sa Scoil agus teacht chun cainte linn. Bítear ag obair le stiúrthóir acadúil i gcás an MLitt agus an PhD, duine a chuireann treoir agus comhairle ar fáil ó thús deireadh an tionscadail taighde.

Le tuilleadh eolais a fháil maidir le féidearthachtaí taighde leis an MLitt nó an PhD in aon cheann d'ábhair na Scoile cuir scéal chuig (opens in a new window)michael.j.wallace@ucd.ie